Ego Willermus, dominus Dygonie, notum facio omnibus presentes litteras inspecturis, quod cum dominus Hugo, pater meus, quondam dominus Dygonie, ecclesie Cluniacensi, pro remedio anime sue, quadraginta solidos Divionenses annuatim percipiendos dedisset in elemosinam, et in perpetuum concessisset, ego dicti patris mei anime et proprie providens saluti, vigenti solidos dicte monete premisse duxi adiciendos quantitati, volens pariter et concedens, quod ecclesia predicta de redditu meo censuali Dygonie, qui a me vel mandato meo in festo Nativitatis beate Marie apud Dygoniam singulis annis percipitur, sexaginta solidos Divionenses in eo valore in quo erat dicta moneta quando date fuerunt presentes littere, absque difficultate aliqua, in festo predicto percipiat annuatim; et si forte contingeret nuncium ecclesie pretaxate predicto termino non venire, non obstante hoc, postmodum nuntio venienti premissa pecunie quantitas plenarie solveretur. Ad cujus solutionem de premisso redditu, sicut superius premissum est, faciendam, prepositus meus de Dygonia, et alii prepositi qui pro tempore fuerunt, tenentur. Preterea si (quod absit!) contingeret elemosine predicte per defectum meum vel successorum meorum, qui pro tempore dictum redditum percipient, aliquod impedimentum opponi, volo pariter et concedo, quod reverendus pater Eduensis episcopus, qui pro tempore erit, ad observationem elemosine premisse per censuram ecclesiasticam me vel ipsos successores meos compellat, meam vel ipsorum successorum meorum personas, si necesse fuerit, excommunicationis sententia percellendo seu terram meam seu ipsorum interdicti sententie supponendo. Ut autem premissa donatio firmitatem obtineat inconcussam, sigilla venerabilium virorum B. cantoris et G. archidiaconi Eduensium, cum sigillo meo apponi presentibus procuravi. Actum et datum anno Domini millesimo ducentesimo quadragesimo quinto, mense septembris.