Viris venerabilibus et discretis sibi karissimis patribus et dominis priori et conventui Cluniacensi, frater Stephanus, dictus prior, et conventus Cellæ Vilmaris, ejusdem ordinis, debitam obedientiam et devotam. Paternitati vestræ dignum duximus intimandum, quod Fridericus, frater domini comitis Firretensis, prior quondam in Altechile, nuper ad nos accessit pedes et male vestitus, asserens quod ei domorum nostrarum, de Cella Vilmari videlicet et de Thieranbach, contuleritis prioratus; dicens etiam se habere litteras vestras. Sed mihi eas non vult ostendere. Dicit etiam se habere prioratum de Althethile. Quod cum nos sine litteris credere non possemus, dictus Fridericus accessit ad quendam aurificem, rogans illum ut ei sigillum faceret ad instar sigilli abbatis Cluniacensis. Qui noluit, sed respondit quod non esset falsarius sigillorum, statimque nobis mandavit. Unde nos præsumimus quod ipse sine vestra licentia recesserit ab ecclesia Cluniacensi. Hinc est ergo quod paternitatem vestram humiliter deprecamur, quatinus super prædictis nos certificare dignemini, scientes quod obedire volumus semper vestræ beneplacito voluntatis. Nos autem conventus, flexis genibus et fusis lacrymis benignitati vestræ humiliter supplicamus, ne dictum Fridericum, qui per omnes fines nostros monachi et presbyteri esse dignoscitur homicida, quique fratres suos regens in virga ferrea non corripuit, sed potius trucidavit, nobis dare velitis in priorem: quia juxta ipsum stare non possemus ullo modo, timentes ex relatione priorum nobis periculum imminere. Cetera lator vobis dicet.