Litteræ quibus P., Tutelensis abbas, exorat Cluniacensem abbatem ut recommendatum habeat Aldemarum, concorditer postulatum in abbatem Figiacensem.
Religioso viro et discreto et domino suo karissimo venerabili Dei gratia abbati Cluniacensi, P. divina miseratione Tutellensis abbas, salutem et obedientiæ in Domino karitatem. Cum Aldemarus, cellerarius Aureliacensis, concorditer et canonice in abbatem Figiacensem fuerit postulatus et postulationi de se factæ assensum præbuerit de voluntate abbatis sui abbatis Aureliacensis, sicut a fide dignis audivimus, discretionem vestram duximus exorandam et rogandam amicabiliter et attente, quatinus dictum Aldemarum, virum utique providum et discretum, qui bonæ famæ et laudabilis conversationis existit, prout humana fragilitas nosse sinit, recommendatum habentes, postulationem de ipso factam a Figiacensi capitulo dignemini confirmare et ipsum in suis justis petitionibus exaudire, cum ad regimen Figiacensis ecclesiæ idoneus reputetur. Datum apud Aureliacum, quarta feria ante instans festum Epiphaniæ, anno Domini M.CC.XLV.