CCE: cartae cluniacenses electronicae
Database of the Charters of the abbey of Cluny (802-1300)

BB 4875     View  [Back]
Litteræ Fulconis, abbatis Monasterii Novi, ad abbatem Cluniacensem, quibus se excusat de absentia sua a capitulo generali, propter Pictavensis episcopi oppressiones, etc.
Sanctissimo in Christo patri ac domino Willermo, digna Dei providentia Cluniacensis ecclesiæ venerabili abbati, frater Fulco, Dei permissione ecclesiæ Sancti Johannis Monasterii Novi Pictavensis, Cluniacensis ordinis, suus abbas humilis et devotus, totusque conventus ipsius ecclesiæ, salutem et obedientiam tam debitam quam devotam. Paternitati vestræ conquerendo tenore præsentium facimus manifestum, quod episcopus Pictavensis, qui nos occasione quod sumus Cluniacensis ordinis et exempti, in quantum potest persequitur, opprimit et infestat, eo quod ratione privilegiorum Cluniacensis monasterii, nitimus prout possumus, quando opus est et debemus, resistere ei et suis infestationibus obviare, ecclesiam nostram de Podio Beatæ Mariæ et familiam et homines nostros malitiose et indebite contra privilegia Cluniacensis ecclesiæ faciendo supponi interdicto: hinc est quod paternitati vestræ supplicamus attentius et devote, quatinus super hoc, si placet, vestrum consilium apponentes, privilegia, si qua habetis ad hoc facientia, nobis per latorem præsentium dignemini destinare, ut inde jura Cluniacensis ecclesiæ et nostræ possimus defendere et oppressionibus ejusdem episcopi obviare. Verum quia, prout intelleximus, mandavistis quod omnes priores prioratuum nostrorum ad generale Capitulum Cluniacense veniant et intersint, paupertates eorum et oppressiones nostræ ecclesiæ, ut credimus, ignorantes, paternitatis vestræ pietatem in visceribus Jesu Christi duximus exorandam, quatinus, si vobis placet, parcatis in hoc eorum laboribus et expensis; tum propter paupertatem eorum, quorum vix suppetunt facultates ad notitiam ipsius itineris perquirendam; tum propter subventionem domini papæ et procurationem domini legati; tum propter necessitates ecclesiæ nostræ, quam oportet de novo nostris propriis sumptibus, sine alterius adjutorio, et jam ipsam incepimus reficere; tum propter adventum comitis Pictavensis, qui modo de novo cum uxore sua et familia ad partes nostras dignoscitur accessisse, et a nobis et membris nostris intendit magnam quantitatem pecuniæ extorquere; tum propter oppressionem comitis Augi, quam necesse habuimus hoc in anno præsenti magna pecuniæ summa redimere, ut magni proventus nostri et quasi majores, quos penitus distruebat et dissipabat, possent nobis libere remanere; tum propter oppressiones aliorum nobilium, quas prolixum esset et longum nimium enarrare; tum quia eodem tempore quo Cluniacense capitulum debet et consuevit nostrum capitulum celebrari, et computationes et rationes inter nos et priores nostros fieri et tractari; tum propter alia multa negotia non expressa, quæ vobis per latorem præsentium duximus declaranda. Super quibus omnibus, paternitatis vestræ pietatem deprecamur affectu quo possumus ampliori, quatinus illi vestræ ecclesiæ misericorditer parcere dignemini, quæ semper sub omni jugo obedientiæ ecclesiæ Cluniacensi intendit et studuit deservire. Feliciter et diu valeat paternitas vestra in Domino. Datum die veneris ante Lætare Jerusalem, anno Domini Mo CCo quadragesimo quinto.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung