Universis presentes litteras inspecturis, Manasserius, humilis supprior de Lehuno, et ejusdem loci conventus, salutem in Domino. Universitati vestre notum facimus, quod nos status domus nostre de Lehuno et aliarum domorum nostrarum fideliter inquisivimus prout melius potuimus, et ita invenimus: quod domus nostra de Lehuno debet XV^c et XXXV lib. par. et XVI sol.; et habet dicta domus nostra suam integre furnesturam. Domus autem nostra de Davenescort debet CCC lib. par.; domus nostra de Bove, VIII^xx et X lib. par. et XIIII modios bladi; domus nostra de Merincort, XL lib. par.; domus nostra Sancti Taurini, C lib.; domus nostra de Bretegni, VII^xx et X lib. par., hoc excepto quod grangia nostra de Borguegnon, pertinens ad domum de Bretegni, debet domino Petro de Sancto Ypolito vel ejus heredibus in perpetuum quinquaginta lib. par. annuatim; domus autem nostra de Chirisi, CC et XV lib. par., et domus nostra de Fane, que pertinet ad prioratum de Cherisi, similiter debet XL lib. par. De ducentis autem libris par. quos (sic) Hugoninus, nepos quondam prioris nostri nuper defuncti, detulit in octabis Ascensionis bene recolimus. De aliis autem multis denariis quos secum detulit feria tertia post Trinitatem, sicut aliqui dicunt, adhuc numerum nescimus neque veritatem. Et quod ratum sit, et ad noticiam singulorum perveniat, presentes litteras sigillorum nostrorum impressione roboravimus. Datum anno Domini M^o CC^o XL^o septimo, sabbato ante Magdalenam. (Traces de deux sceaux)