Excellentissime et domine sue karissime, B., Dei gratia Francorum regine, B. de Pyano, ballivus Masticonensis, suus in omnibus, salutem cum omni reverentia et honore. Excellentie vestre significo me personaliter ad locum seu nemus quod dicitur Borserius interfuisse et per nostras gentes diligenter inquississe, necnon etiam fama publica denontiat quod dominus ... abbas Cluniacensis habet et a tempore quo non extat memoria semper habuit meram jurisdictionem et omnem justiciam in nemore supradicto, et etiam infra terminos appositos et privilegiatos quos vidimus, secundum quod reperimus manifeste, et cum de hoc plus facere non audeam absque vestra licentia speciali, vobis quod inventum est per presentes litteras notifico, ut vos inde faciatis prout excellentie vestre videbitur expedire. Datum anno Domini M^o CC^o XL^o nono, die veneris post festum Pentecostes.