CCE: cartae cluniacenses electronicae
Database of the Charters of the abbey of Cluny (802-1300)

BB 4914     View  [Back]
Charta qua Philippus, Bononiensis archidiaconus, notum facit abbatem Cluniacensem sibi concessisse ad vitam suam prioratum Sancti Gregorii Placentinensis.
Universis presentes litteras inspecturis, Philippus, archidiaconus Bononiensis, capellanus venerabilis patris domini Guilielmi, Sancti Eustachii diaconi cardinalis, salutem in Domino. Noverit universitas vestra quod cum venerabilis pater W., Dei gratia abbas Cluniacensis, michi, ad preces reverendi domini mei cardinalis predicti, prioratum Sancti Gregorii Placentinensis ad eundem abbatem pleno jure spectantem, quoad vixero sub annuo censu duxerit concedendum, ego, in predictorum domini mei et abbatis presentia constitutus, spontaneus juravi, tactis sacrosanctis euvangeliis, quod jura, libertates et possessiones dicti prioratus et pertinenciarum suarum in bono statu conservabo, et ea vel eas non vendem (sic), non alienabo, non donabo, non infeodabo, non accensabo, nec aliquid scienter faciem (sic) vel fieri permittam quod in prejudicium dicti prioratus vel pertinentiarum suarum seu ordinis aut monasterii Cluniacensis redundet. Censum autem solitum monasterio Cluniacensi debitum eidem abbati vel certo nuntio suo apud Papiam, in prioratu Sancti Mayoli ad Cluniacense monasterium pertinentem, in festo Omnium Sanctorum, annuatim persolvem; duobus autem monachis ibidem Deo servientibus in omnibus vite necessariis competenter providebo; omnia vero onera ejusdem prioratus ac pertinenciarum suarum faciam meis sumptibus, ac etiam procurabo visitatores ac nuntios antedicti abbatis et successorum suorum honeste recipiem ac competenter eisdem in vite necessariis providebo; procuratores abbatis Cluniacensis qui pro tempore fuerint et suorum eundo et redeundo totaliter persolvem, et si in solutione census soliti predictis loco et termino, prout superius est expressum, deficerem, pro qualibet die usque ad mensem quinque solidos pro pena solverem, et nisi infra mensem dictum censum solitum cum pena predicta solverem, ipso facto prioratum amitterem memoratum, et tunc idem abbas vel successores sui de predicto prioratu secundum suam disponerent voluntatem. Post mortem autem meam, predictus prioratus cum omnibus pertinentiis suis, juribus, libertatibus et possessionibus liber et immunis ab omni debito, cum omnibus mobilibus et immobilibus, omni melioratione et incremento, ad monasterium Cluniacensem, absque alicujus contradictione, quiete et pacifice revertetur. Omnia siquidem supradicta et singula, prout superius sunt expressa, tactis sacrosanctis euvangeliis, juravi, si[c] Deus me adjuvet et sancta Dei euvangelia, firmiter observare et tenere, nec contravenire per me vel per alium ullo modo. In cujus rei testimonium, sigillum meum duxi presentibus litteris apponendum. Datum Lugduni, XIIII kal. augusti, anno Domini Mo CCo XLo nono, pontificatus vero domini Innocentii pape quarti anno septimo.
(Au dos:) Carta prioratus Sancti Gregorii Placentinensis.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung