Notum sit universis presentes litteras inspecturis, quod ego Willelmus de Salzac, domicellus, pro me et pro omnibus heredibus aliisque successoribus meis in perpetuum, sine omni conditione et retentione, vendo et titulo pure et perfecte venditionis trado vel quasi tibi Pagano, priori ecclesie de Grazac, nomine et ad opus ipsius ecclesie, et per te ipsi ecclesie et successoribus tuis in ipsa ecclesia vendo, inquam, tibi ut suprascriptum est, illam chabanariam meam et quicquid juris in ipsa habeo ratione dominii utilis vel directi, vel jure proprietatis vel possessionis, sive actione reali vel personali; quam chabanariam tenet apud villam de Mons quidam homo meus, qui vocatur Chapdurs, et ipsum hominem et quicquid juris in persona illius habeo vel debeo habere, et predictam apendariam cum domo ejus et semaria (?), et dictum hominem meum cum dominio, quantum ad me pertinet, vendo tibi priori, ut suprascriptum est, cum pertinentiis eorum, precio novem librarum Viennensium, de quibus, exceptioni non habite et non tradite pecunie renuntiando, teneo me pro pagato ... Preterea nos Artauda, uxor, et Hugo, filius dicti Willelmi, venditoris, dictam venditionem et alia suprascripta concedimus, laudamus et approbamus, donantes et cedentes ac quittantes tibi dicto priori ac successoribus tuis et ecclesie tue predicte jus quodcumque nobis in dictis rebus et juribus competit et competere potest; renunciando ego dicta Artauda privilegio dotis et ypothece, specialibus et generalibus, tacite et expresse, et ego dictus Hugo renuncio beneficio minoris etatis et restitutioni in integrum, et ambo renunciamus omni alii auxilio et beneficio juris canonici, consuetudinarii et civilis, promulgati et promulgandi, statuti et statuendi, quo possemus nunc et in futurum contra predicta venire. Dictam autem venditionem et alia suprascripta a nobis facta premissa et dicta, nos Willelmus de Salzac, venditor, Artauda, uxor, et Hugo, filius ejus, predicti, attendentes bona fide tibi dicto priori et ecclesie tue ac successoribus tuis et observabimus et contra non veniemus, per nos vel per alium, in jure vel extra. Sic Deus nos adjuvet, et hec sancta ejus euvangelia que manu mea tango, et de predictis venditis et eorum pertinentiis nos devestimus vel quasi, et te dictum priorem nomine dicte ecclesie et per te ipsam ecclesiam investimus vel quasi, et in possessionem eorum vel quasi te mittimus nomine ecclesie jam dicte. Acta sunt hec apud Essragau, mense junii, XVI kalendas julii, anno Domini M^o CC^o quinquagesimo, presentibus testibus: Jarentone de Lapta, Johanne Chabrol, bajulo de Grazac, Baillot de Monistrol, Pontio de Rogeis, W. de Bonas, Weco Ayner, Juliano Fener, Willelmo Neell, Albert, Martino, Iterio, W. Pariso, et Durando Roga. Et ad majorem securitatem et testimonium predictarum, fuit hec carta sigillo domini B[ernardi], Dei gratia episcopi Aniciensis, et sigillo dicti domini de Salzac venditoris sigilata (?). (Le sceau de l'évêque subsiste, l'autre est perdu)