Viris venerabilibus et religiosis ... abbati et capitulo Cluniacensi, A., comes Sabaudie et marchio in Ytalia, salutem que est in Christo Jhesu cum gloria celesti. Cum religionem vestram tali ac tanta credamus discretione fulgere, ut salubribus consiliis et utilibus precibus benignum semper et facilem velit assensum prebere, et domus vestra de Burgeto, a progenitoribus nostris fundata et sub ipsorum tuicione in bono actenus statu servata, tamen, propter situm loci et conditionem tenuis in facultatibus existat, domunculaque de Conze eidem vicina, propter vicinorum maliciam et defensorum carentiam, sepe sit ad ultimam desolationem perducta et eadem vel etiam majora pericula defuncto vel amoto priore qui nunc est, ipsi domui videantur inminere, rogamus discretionem vestram modis omnibus et requirimus bona nichilominus consciencia consulentes, quatinus unius utilitati et alterius, immo vestre pocius indempnitati consulentes, ita dictas domos unire studeatis, ut de cetero non nisi unus prior ambabus preficiatur, et unico jure utraque censeatur, salvo per omnia jure vestro, quod ubique volumus illesum conservare. Tantum autem super hoc ad preces nostras facere curetis, ut vobis ad graciarum actiones teneamur et ad benefaciendum dictis domibus, sicut jam cepimus, provocemur, nec super hoc superiorem requirere debeamus, scientes certissime quod nulla propria utilitas, sed simcerus amor et karitas quam erga dictas domos et habitatores habemus, ad scribendum vobis nos inducit. Quid autem super hoc facietis, nobis rescribere non obmittatis. Datum Chilhoni, anno Domini M^o CC^o quinquagesimo secundo, pridie idus aprilis. (Reste du sceau, sur lequel on voit un cavalier, avec contre-sceau)