Notum sit universis presentibus et futuris, quod ego Pontius Hymberti, domicellus, in presentia virorum nobilium, Constantii scilicet, Hymberti Maleti et domni Jocerandi Dussora, consanguinei mei, ego, inquam, dictus Pontius, de consensu et voluntate dictorum arbitrum, (sic) qui fui filius Pontii Hymberti militis, in compensatione dampni dati et pro illata injuria domui et ecclesie de Grasac a Vassalo Bellijoci, avunculo meo, pro remedio autem ipsius Vassalli, concedo vobis dicto Pagano, priori domus de Grasac, et successoribus vestris, domuique supradicte, titulo pure et perfecte quittationis, sine omni conditione, trado vel quasi vobis, domne prior, presente vel recipiente, quecumque habeo et habere possum, sine retentione proprietatis vel dominii utilis vel directi, sive ratione possessionis aut quocumque alio modo vel ratione, sine retentione et exceptione, quitto, trado in perpetuam inphyteosim Pontium Pilay, fidelem meum, et heredes aliosque successores suos, vobis dicto priori dono et vestris successoribus, donatione inter vivos pura et simplici; cedo et quitto, concedendo et cedendo, promittens insuper, ego dictus Pontius, attendere, observare et contra eorum aliquid non veniam in jure vel extra; sic Deus me adjuvet et hec sancta ejus euvangelia, que manibus meis corporaliter tango, et contra supradicta non veniam, nec alius arte mea, ingenio vel mandato. Preterea ego sepedictus Pontius recognosco et fateor a vobis, domne prior de Grasac, me habuisse et recepisse quinquaginta solidos Viennensis monete, de quibus exceptioni non numerate et non tradite pecunie, et pretii non soluti renunciando expresse, ego dictus Pontius teneo in solidum pro pagato, et vos dictum priorem et vestros de ipso quitto in manu venerabilium virorum domni Hymberti Maleti et domni Jocerandi Dussori, quos statuo fidejussores hujus facti, presentibus Jarentone de Lapte et Guichardo, monachis; Johanne Chabrol, capellano de Grasac; Hyterio de Lapte, Weo. Dussoni (?), Willelmo de Mansso, domicellis; Willelmo Novelli, Juliano Satore, Avito, et pluribus aliis. Actum anno Domini M^o CC^o quinquagesimo secundo, infra ecclesiam de Grasac, in octabis beati Andree apostoli. Ad instantiam utriusque partis, ad atestationem predictorum, nos Hymbertus Maleti et Jaucerandus Dussoni (?) sigillorum nostrorum impressione presentem cartam fecimus communiri.