Innocentius, episcopus, servus servorum Dei, dilectis filiis ... de Marcio et ... de Bellavilla prioribus, Nivernensis et Lugdunensis diocesum, et ... cantori Lugdunensi, salutem et apostolicam benedictionem. Cum sicut dilectus filius Guillelmus, rector ecclesie de Cariloco, clericus dilecti filii ... abbatis Cluniacensis, Matisconensis diocesis, nobis exposuit causam que inter ipsum et Bernardum, presbiterum ejusdem diocesis, vertebatur, super eo quod venerabilis frater noster ... episcopus Matisconensis in ipsa ecclesia eidem G., au[c]toritate apostolici collata, prefatum B., post appellationem ab ipso G. ad sedem apostolicam interjectam, contra justitiam instituerat, dilecto filio magistro Matheo de Asperino, capellano nostro, duxerimus committendam, idem capellanus, cognitis cause meritis, et juris ordine observato, diffinitivam pro eodem G. sententiam promulgavit, prout in instrumento publico confecto exinde plenius continetur, quam idem G. apostolico petiit munimine roborari. Nos igitur ipsius suplicationibus inclinati, sententiam ipsam provide latam ratam et gratam habentes, et auctoritate apostolica confirmantes, discretioni vestre per apostolica scripta mandamus, quatinus jam dictum G. vel procuratorem suum ejus nomine, in corporalem possessionem ejusdem ecclesie, amoto ab ea ipso B., seu alio quolibet illicito detentore, per vos vel per alios inducatis et defendatis inductum, contradictores per censuram ecclesiasticam, appellatione postposita, compescendo, invocato ad hoc, si non sufficit ecclesiasticum, auxilio brachii secularis. Non obstantibus si aliquibus a sede apostolica sit indultum, quod interdici, suspendi vel excommunicari seu extra certa loca citari non possint per litteras apostolicas non facientes plenam de indulto hujusmodi mentionem, et constitutione de duabus dietis edita in concilio generali, dummodo ultra tertiam vel quartam aliquis extra suam diocesim auctoritate presentium ad judicium non trahatur. Quodsi non omnes hiis exequendis potueritis interesse, duo vestrum ea nichilominus exequantur. Datum Asisii, nonas maii, pontificatus nostri anno undecimo.