In nomine Domini nostri Jesu Christi. Amen. Anno ejusdem M^o CC^o LX^o, in vigilia Assumptionis Sancte Marie, bone memorie Guilhelmo, Dei gratia abbate Moysiacensi, viam universe carnis ingresso, et ejus corpore tradito ecclesiastice sepulture, nos frater Geraldus, humilis prior monasterii Moysiacensis, Cluniacensis ordinis, Caturcensis dyocesis, et totus conventus ejusdem loci, pulsata, sicut moris est, campana ad capitulum congregandum, convenimus in capitulo ejusdem monasterii, ut haberemus de electione seu provisione futuri pastoris colloquium et tractatum; et invocata Spiritus Sancti gratia, nos predictum capitulum concorditer et unanimiter elegimus dompnum Geraldum predictum et dompnum Raimundum, priorem Ville Nove, Ruthenensis dyocesis, monachum ejusdem monasterii, et eidem monasterio inmediate subjectum, ad eligendum tres electores de conventu nostro, dantes eisdem plenam et liberam potestatem eligendi seu assumendi secum tres personas seu monachos de dicto conventu, sive sint de residentibus in conventu, sive sint de prioribus intrincecis vel extrincecis dicte domus, qui una cum eis liberam potestatem haberent ista vice dicto monasterio providendi; recepta, post dictam electionem seu nominationem a se factam, a dicto conventu potestate libera hac vice dicto monasterio providendi. Et tandem predicti Moysiacensis et Ville Nove priores, recepta a toto conventu hujusmodi potestate, habito diligenti consilio et tractatu, nominaverunt, elegerunt seu assumpserunt sibi electores ut supradictum est religiosos viros B., priorem Sancte Marie Deaurate Tholose, et Petrum de Varaone, cellerarium dicti monasterii, et Beraudum, priorem de Salvitate Montis Corbelli, Tholosane dyocesis, monachos ejusdem conventus; et electione facta, seu assumptione, dictam electionem seu assumptionem nobis predicto conventui sollempniter publicarunt. Quorum electionem seu assumptionem nos totum capitulum ratam habuimus atque firmam, et eisdem tribus una cum duobus electoribus, scilicet Moysiacensi et Ville Nove prioribus, liberam potestatem eligendi, postulandi et providendi concessimus in hunc modum. Nos frater P., prior claustralis monasterii Moysiacensis predicti, et totus conventus ejusdem loci, damus et concedimus religiosis viris dompno G., priori majori Moysiacensi, et Raimundo, priori Ville Nove, et Bertrando, priori Beate Marie Deaurate Tholose, et Petro de Varaone, cellarario dicti monasterii, et Beraudo, priori de Salvitate, dicto monasterio immediate subjectis, liberam potestatem eligendi, postulandi, et providendi ex se vel ex aliis vel etiam undecumque eis placuerit, de ordine Cluniacensi, de pastore hac vice monasterio Moysiacensi, et nobis pastoris solatio destitutis, promittentes et concedentes, et etiam jurejurando firmantes ad sancta Dei evangelia, quod illum recipiemus pro abbate et pastore nostro et dicti monasterii, quem ipsi quinque vel major pars illorum elegerint, postulaverint, nominaverint in abbatem predicti monasterii Moysiacensis, quousque hac vacatione nobis providerint de pastore; et totam potestatem et auctoritatem quam nos habemus et habere debemus providendi dicto monasterio viduato pastori, pure et libere transferimus in eosdem vel in majorem partem ipsorum, ita quod illud quod factum fuerit per eosdem firmum et stabile perseveret acsi a nobis personaliter esset factum. Et volumus et concedimus quod unus ex ipsis quinque possit voluntatem aliorum secum eligentium, postulantium seu providentium super istis pronunciare et publicare, ita quod illud quod unus ipsorum pronunciaverit vice sua et vice sociorum suorum seu majoris partis eorum, tantum valeat acsi per omnes ipsos seu per omnes nos pronunciatum fuisset. Et tunc predicti electores, recepta in se hujusmodi potestate, juraverunt ad sancta Dei evangelia quod dicto monasterio, amore, hodio, vel timore, carnalitate, et omni corruptione postpositis, bona fide providebunt nobis et dicto monasterio de abbate seu pastore. Et tunc erant in conventu predicto: predictus P., prior claustralis, P., camararius, Pontius, infirmarius, Calsanus, helemosinarius, Guillelmus, operarius, Bertrandus, prior de Serinhaco, G. Costena, prior de Meozag, Artmandus, prior de Rabastenx, Celebrunus, prior de Peiroza, G. Dorguolh, prior de Pomervig, Arcanbaldus, prior de Senag, Pis, prior de Conquetas, Johannes de Rupe Amatoris, prior de Castro Maira, Bertrandus Barravi, prior Sancti Matfredi, Vitalis de Paone, prior Castri Sarrasseni, R. de Monte Pezato, prior de Coquinis, Berengarius, prior de Calsiata, Bernardus Esperc(?), prior de Sancto Lanfatio, Bonellus, Willelmus Petri, Guillelmus de Tarnat, prior de Marselh, Bertrandus Willelmi, Hugo de Monte Cuquo, Gualhardus de Monte Acuto, Willelmus Carroffus, Arnaldus de Croza, Guido de Curamonta, Aldematius de Petra Insisa, Bertrandus Taosca, Rainfredus, Willelmus Vasco, Artmandus, Bernardus Belot, Petrus de Vairag, Robertus G., Bertrandus de Figaco, Huguo de Monte Salvi, Bertrandus de Villa Nova, Willelmus de Tussag, Raymundus de Sancto Egidio, R. B. suus scriba, Ferrerius, G. Rigualdi, P. de Valon, Arnaldus de Canaves, Bernardus de Bessenx, Nicholaus, Durandus Farac, Gualbertus Tondut, Willelmus Tufardi, Bertrandus de Lizog, Matheus Nassaut, Willelmus de Cornelha, Miro, Bertrandus Arriaut, Bertrandus de Zitat et Arnaldus Conversus, et Pontius Pellicerii, et predicti quinque electores, qui omnes unanimiter et concorditer predictis omnibus et singulis expresse consenserunt, et omnia et singula laudaverunt et approbaverunt. Et eguo Johannes Fabri, publicus notarius Moysiacensis, de mandato et voluntate omnium predictorum, isti publico instrumento, vice ipsorum omnium et singulorum subscripsi et signum meum (ici le paraphe) vice illorum apposui. Et nos predicti P., prior claustralis, et totus conventus, et predicti quinque electores sigilla nostra apposuimus huic publico instrumento in testimonio predictorum.

Et in crastinum predicte festivitatis beate Marie, supradicta omnia et singula, in presentia totius supradicti conventus et omnium predictorum, fuerunt lecta et diligenter in predicto capitulo recitata, et ibidem per dictum conventum concessa, approbata et etiam confirmata. Hujus rei sunt testes vocati et rogati per dictum conventum et per omnes et singulos supradictos: dompnus abbas Figiacensis et ejus socius Petrus Oliverii, prior Sancti Petri de Alba Rupe, et dompnus abbas Leratensis, et Willelmus, prior Leratensis, et Pontius de Mornaco, prior de Duroforte, P. de Villa Nova, operarius Lesatensis, Arnaldus de Bruno, helemosinarius Leratensis, Arnaldus de Fita, P. de Albiaco, et eguo Johannes Fabri, communis notarius de Moysiaco, hoc presens scripsi instrumentum, et in publicam formam redegi, predicti conventus et omnium predictorum voluntate pariter et consensu. (Paraphe)