Nos Seguinus, Dei gratia Matisconensis ecclesie minister humilis, notum facimus universis presentes litteras inspecturis, quod cum nobilis vir Regnaudus, dominus Buxerie, in feodum, homagium et casamentum a religiosis viris abbate et conventu Cluniacensi et per ipsos a successoribus eorumdem diu est accepisset quidquid habet, possidet, vel quasi, habere vel possidere, vel quasi potest in villa ac valle de Dardre, a Coceolis usque ad quercum de Byais, et quidquid habet, possidet, habere vel possidere, vel quasi potest in villa de Mator et ipsius pertinentiis, prout hoc confessus est coram nobis; idem Regnaudus in nostra presentia constitutus propter hoc, in augmentum feudi, homagii et casamenti predictorum, se recepisse fatetur a religiosis viris Yvone nunc abbate et conventu Cluniacensi, et per eos a successoribus eorumdem in feodum, homagium et casamentum feoda que tenent ab eodem Regnaudo Dalmacius, dominus de Dyo, Hugo de Buxeria, Jaquetus de Barbaresches, Achardus de Buxeria et Guillelmus de Soloniaco, milites; Stephanus de Berziaco, Guichardus de Dardre, Girardus de Chaigniaco, Hugoninus de Nay et filii Jocerandi de Nay, filii Guillermi de Miolano, Guillelmus de Chasautiart, Hanricus de Marchiset, et Girardus de Buissuil, domicelli. Item feoda que tenent ab eodem Regnaudo prepositus de Tervi, Bernardus Vezians, Martinus Lirate, et Petrus Belierz. Item omnia et universa que idem Regnaudus habet, possidet, vel quasi habere vel possidere seu quasi potest in villa de Martigniaco, in villa de Tramblei, in villa Capelle de France, in villa de Miolano, in villa de Bargosereno, et padagio ejusdem ville, ac etiam in tota terra Busserie, cum omnibus juribus, pertinenciis earumdem villarum et terre, tam in terris, hominibus, usagiis, gardiis, justiciis, servitutibus, nemoribus, pratis, pascuis, viis, semitis, aquis, padagiis, consuetudinibus, servitiis et redditibus, quam etiam generaliter in omnibus aliis, castro Buxerie, cum hiis que spectant ad idem castrum, infra pontem de Tremblei, planchiam asinariorum, pontem Veteris Buxerie, et molendinum Gerbe, que a nobili viro domino Bellijoci dictus Regnaudus se asserit tenere in feodum, dumtaxat exceptis. De supradictis autem omnibus tenetur idem Regnaudus et sui heredes de cetero facere homagium successoribus prenominati Yvonis abbatis qui pro tempore fuerint, et eidem abbati et Cluniacensi ecclesie fidelitatem servare. Juravit siquidem idem Reygnaudus, supra sancta Dei euvangelia coram nobis, quod antea non tenuerat nec tenebat ab aliquo in casamento, vel feodo, vel aliquo alio modo res superius nominatas, excepto feudo domini Bellijoci supradicto, promittens per prestitum coram nobis corporaliter sacramentum, totale feodum supradictum predicto abbati, ejus successoribus, et Cluniacensi ecclesie in perpetuum garantire, se et heredes suos et omnia bona mobilia et immobilia, ubicumque existentia et specialiter quidquid habet, possidet vel quasi, seu habere vel possidere potest in villa ac valle de Dardre et villa de Mator, cum pertinentiis eorumdem, que superius sunt expressa, predicto abbati et ecclesie Cluniacensi super hoc obligando. In cujus rei testimonium, ad preces et instantiam predicti Regnaudi, presentes litteras supradicto Yvoni abbati concessimus, sigilli nostri una cum sigillo premissi Raygnaudi munimine roboratas. Actum anno Domini M^o CC^o sexagesimo, mense martio.