CCE: cartae cluniacenses electronicae
Database of the Charters of the abbey of Cluny (802-1300)

BB 5039     View  [Back]
Charta qua Galterus, Stephani de Mailliaco consanguineus, vendidit monasterio Cluniacensi jus suum in quibusdam rebus hic enumeratis.
Nos Seguinus, Dei gratia Matisconensis episcopus, notum facimus universis presentes litteras inspecturis, quod Galterus de Mailliaco, miles, in nostra propter hoc presentia constitutus, recognoscens quod se inferius nominatis una cum Stephano de Mailliaco, domicello, consanguineo suo, medietatem habere et possidere et quasi pro indiviso videlicet in nemore quod est subtus viam qua itur a molendino de Firmitate versus Borvilain et in medietate nemoris existentis desubtus viam predictam in prato et la tope, usque ad nemus, in cursu aque, a ponte Sancti Nicecii usque ad calciatam stagni novi Cluniacensis, in exclusa de Cheviaco, nemore et terris inter duas aquas sitis; in pecia terre que est inter duas [aquas] juxta ulmum prati Guitonis; in pecia terre que est supra pratum magistri Stephani Cauvin; in terra Aymonis Boichedor sociorumque ejus, sita supra molendinum quod dicitur de Firmitate; in decima etiam omnium predictarum terrarum. Item in quarta parte molendini de Chevrie, quarta parte condemine et nemoris de Tosayne; in decima etiam vinearum Crestin Grassoy dou Cray, Letaudi Aubert, David lou Rachat dou Cray, Clemencii Broysart dou Cray, Benedicti Textoris; partis etiam vinee quod Hugo Saichez tenet in Lapidicina, ejus etiam vinee, quam Michael de Claromane tenet ibidem. Item vinearum quas Guillelmus Aveniers, uxor Thephani Garcini, magister Cristinus Bauduini, Richardus de Mailliaco, Agnes de Romaine, hespitale Cluniacense, Stephanus Zcoichons, Dominica dou Melle, Robertus de Lavaicherie et Hugoninus de Porta tenent in terragio Mailliaci. Item in decima vinearum quas Martinus li Aners, Durannus de Jambles et Estevenez tenent in terragio quod dicitur des Murgiers. Item in tribus peciis terre sitis retro nemus de Brueroles et in decima earumdem. Item in quadam pecia terre quam Robertus de Lavaicherie tenent versus les Murgier et alia quam Brancionaz tenent supra fontem Duarum Sororum; item in decima earundem terrarum. Item in quadam pecia terre sita supra grangiam relicte Garnerii de Chides. Item asseruit coram nobis idem Galterus se debere possidere vel quasi medietatem pro indiviso cum Stephano memorato annui servitii seu canonis infrascripti, videlicet trium solidorum et unius denarii Cluniacensis in quibus Guichardus Blains de Varanges et Guillelmus Blains et socii eorumdem tenentur eisdem. Item trium solidorum et unius denarii in quibus illi duo Groselier de Jaloigniaco, sex denariorum in quibus Johannes Viauz et Benedictus de Laperrelle de molendino de la Vevre tenentur eisdem. Item unius denarii in quo Rex de Jaloigniaco et frater ejus; unius denarii in quo Petrus de Laye; trium denariorum in quibus li Bornes dou Moncel et ejus socii; I quarte frumenti in qua domus de Jaloigniaco supra condeminam de Sannay tenentur eisdem. Item XII denariorum in quibus Raolinus li Merciers; sex denariorum Viennensium in quibus Thomas de Bauberie; trium denariorum Viennensium in quibus Jacobus de Folies; quinque denariorum Cluniacensium in quibus Letaudus li Braz; XII denariorum in quibus Johannes li Forniers de Cluniaco; sex denariorum in quibus Crestin dou Cees; quatuor solidorum in quibus liberi Pain et eorum socii; trium denariorum et oboli in quibus Jacobus de Berziaco tenentur eisdem. Item novem denariorum in quibus Philibertus li Tieles; novem denariorum in quibus Johannes dou Vornoi; quatuor denariorum in quibus Robertus de la Vaicherie; duorum denariorum in quibus Petrus Pouce Vilain; novem denariorum in quibus relicta Stephani Manant; duorum denariorum in quibus Vincentius Ratoz; duorum [denariorum] Viennensium in quibus Thomas Groart, presbiter; sex denariorum in quibus Brancionaz; duorum solidorum in [quibus] Michael Rex; XII denariorum in quibus Rosa de Super aquam; VI denariorum in quibus caprarius Cluniacensis pro pastugiis eisdem tenentur. Item decem et octo denariorum in quibus liberi de Chasellis; duodecim denariorum in quibus hospitale Cluniacense; IX denariorum in quibus Michael, filius Perrot; IX denariorum in quibus Guillelmus Aveniers; IX denariorum in quibus Michael de Claromane; aliorum etiam XVIII denariorum in quibus etiam idem Michael; II solidorum et VIII denariorum in quibus Girardus de Buferes; IIIIor denariorum in quibus Philippus de Montenar; trium denariorum Viennensium in quibus Benedictus Bon tenetur eisdem. Item XVI denariorum et oboli in quibus relicta Guichardi, medici; XII denariorum in quibus Simor de Castellis; IX denariorum in quibus liberi Hugonis de Castellis; octo denariorum et unius quadrandis in quibus Duranus Rognati; XII denariorum in quibus Hugo Nicons; IIIIor denariorum in quibus Benedicta li Contoise; II denariorum in quibus Petrus Garcins; IIIIor in quibus Stephanus, filius Jordani; XVI denariorum et oboli in quibus relicta Garnerii de Chides; IIIIor solidorum et IX denariorum et unius quadrantis in quibus Petrus Chivaliers; duorum solidorum in quibus Aymo Boichedor et Butans, frater ejus; VIII denariorum in quibus relicta David Nice; quatuor denariorum et oboli in quibus relicta Cristini de Brunecel et ejus socii tenentur eisdem. Omnium autem et singulorum superius contentorum medietatem jusque suum universum necnon et quicquid habet, possidet vel quasi; habere, percipere, possidere vel quasi potest a Massillis et a ponte Sancti Nicecii, et a sarratis Berziaci usque ad Cort Humbert et usque Massilliacum in longum et latum, ac etiam quicquid habet, possidet, vel qua[si]; habere, possidere vel quasi potest supra pontem predictum, quod vel que novum Cluniacense stagnum possit aut debeat occupare, tam in terris, pratis, nemoribus, vineis, pascuis, molendinis, aquis, aquarumque decursibus, decimis, censibus, aut serviciis, justiciis et dominaturis quam in aliis consu[e]tudinibus aut juribus quibuscunque, memoratus Galterus in nostra, prout supra dictum est, propter hoc presencia constitutus, vendit et ex causa emptionis habendum, percipiendum, possidendum et quasi perpetuo cedit et concedit precio LXa librarum Viennensium venerabilibus in Christo et religiosis viris Yvoni abbati et conventui Cluniacensi, se devestiens et eosdem abbatem et conventum investiens de predictis. Confessus est autem coram nobis miles predictus de predicto precio satisfa[c]tionem habuisse plenissimam a predictis emptoribus in pecunia numerata, promittens eisdem abbati et conventui per prestitum coram nobis super sancta Dei euvangelia juramentum, quod contra venditionem, [confessionem] et concessionem predictas non veniet per se vel per alium in futurum; promittensque sub suorum omnium obligatione bonorum se heredesque suos facturos et curaturos quod iidem abbas et conventus eorumque omnium et singulorum superius expressorum medietatem habebunt, percipient, possidebunt et quasi, pacifice et quiete, seque defensuros in judicio et extra abbatem et conventum predictos eorumque successores, si super premissis aliquo tempore ulla eis questio moveretur de evictione, se heredesque suos expresse nichilominus obligando. Renunciavit etiam in hac parte miles predictus per prestitum coram nobis super hoc sacramentum minus dimidie justi precii, non numerate pecunie, doli, et in factum exceptionibus seu actionibus et etiam omni alii juris beneficio canonici et civilli sibi competenti vel deinceps competituro. In cujus rei testimonium, ad preces et instantiam supradicti Galteri, presentes litteras dicti[s] abbati et conventui concessimus sigilli nostri munimine roboratas. Actum anno Domini M. CC. LX. Io.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung