Urbanus, episcopus, servus servorum Dei, dilecto filio priori prioratus de Laudona, Cluniacensis ordinis, Bisuntinensis dyocesis, salutem et apostolicam benedictionem. Desideriis tuis in hiis affectu benivolo libenter annuimus que tibi profutura speramus. Sane petitio tua nobis exhibita continebat quod tu ac predecessores tui priores prioratus de Laudona, in Sancti Albini, Sancti Simphoriani de Laudona et de Chaucz ecclesiis, eidem prioratu pleno jure subjectis, Bisuntinensi diocesi instituistis rectores cum vacaverunt, visitavistis easdem, ac ipsarum rectores etiam correxistis ac reformastis ibidem que in eis novistis correctionis et reformationis officio indigere, accepistis etiam in eisdem ecclesiis procurationes ratione visitationis debitas, et cognovistis de causis parrochianorum predictarum ecclesiarum ad ecclesiasticum forum spectantium, a tempore cujus memoria non existit et adhuc estis in possessione pacifice predicta omnia exercendi. Nos itaque tuis et dilecti filii abbati[s] monasterii Cluniacensis supplicationibus inclinati, ut premissis veris existentibus, tu et successores tui priores dicti prioratus premissa que tu et iidem predecessores hactenus exercuistis, ut asseris legitime, pacifice et quiete possitis in posterum libere exercere, tibi et eisdem successoribus auctoritate presentium indulgemus. Nulli ergo, etc. Si quis autem, etc. Datum Viterbii, nonas marcii, pontificatus nostri anno primo.