Nos Johannes, Dei gratia Matisconensis episcopus, notum facimus universis presentes litteras inspecturis, quod Bernardus de Brueria, miles, in nostra propter hoc presentia constitutus, confessus est se vendidisse et ex causa emptionis in perpetuum tradidisse venerabilibus Yvoni, abbati, et conventui Cluniacensi medietatem aque et piscarie cum pertinentiis earumdem, que habebat, tenebat et possidebat vel quasi pro indiviso cum Perraudo de B[r]ueria, domicello, a ponte Sancti Nicecii usque ad pontem Sancte Cecilie, et quod in pratis ejusdem militis juxta ripam aque predicte sitis piscatores ipsorum abbatis et conventus sua possint reficere recia vel etiam desiccare et in ipsis juxta ripam eandem officium exercere, tantum prata eadem cum servitio inde debito sibi retinendo precio quadraginta librarum Viennensium; de quo precio confessus est coram nobis sibi satisfa[c]tum esse a predictis abbate et conventu in pecunia numerata. Promisit siquidem idem Bernardus predictis abbati et conventui per prestitum juramentum coram nobis ad sancta Dei euvangelia ac sub suorum omnium obligatione bonorum, quod contra venditionem predictam non veniet per se vel per alium in futurum, se heredesque suos facturos et curaturos, quod predictos abbatem et conventum et successores eorum aquam predictam, ipsius decursum, piscariam in aqua eadem cum pertinentiis eorumdem habere, tenere licebit in perpetuum et pacifice possidere; predictam siquidem venditionem Petronilla, [uxor] dicti Bernardi, laudavit et per sacramentum de non veniendo contra coram nobis corporaliter prestitum acceptavit. Renuntiaverunt etiam in hac parte Bernardus et Petronilla predicti per predictum super hoc juramentum coram nobis corporaliter non numerate pecunie, doli, et in factum exceptionibus, privilegio dotis, ac omni alii juris benefitio sibi competenti vel deinceps competituro. In cujus rei testimonium, ad petitionem predictorum Bernardi et Petronille, presentes litteras supradictis Yvoni, abbati, et conventui tradidimus sigilli nostri munimine roboratas. Actum et datum anno Domini M^o CC^o LX^o quarto, mense augusti.