Ego Erardus de Valeri, miles, nobilis viri Johannis, domini de Valeri filius, notum facio universis presentes litteras inspecturis, quod cum ratione donationis eorum que dictus pater meus habet in Arvernia viris religiosis abbati et conventui Cluniacensi a dicto patre meo de assensu meo facte, iidem abbas et conventus quadruplum ipsius donationis in domo sua de Vandopera dicto patri meo et michi assignare et assedere, et pro ipsius domus de Vandopera oneribus supportandis, triginta libras Turonenses dicto patri meo et michi annuatim solvere vel competenter assidere, quoad dictus pater meus et ego vixerimus tenerentur: ego assignationem pro predictis quadruplo et summa pecunie predicto patri meo tam pro se quam pro me eandem recipienti factam, sicut in dicti patris mei super hoc confectis litteris plenius continetur, ratam habeo et acceptam, eamque promitto per stipulationem solempnem inviolabiliter observare aut per me vel per alium nullatenus contraire. In cujus rei testimonium, presentibus litteris sigillum meum apposui. Actum Parisius, dominica in Bordis, anno Domini M^o CC^o LX^o quarto.