Universis presentes litteras inspecturis, Carolus, filius regis Francie, Andegavie, Provincie et Forqualquerii comes, et marquio Provincie, salutem. Cum sanctissimus pater et dominus noster, dominus Clemens, sacrosancte Romane et universalis ecclesie summus pontifex, ad salutarem consummationem tractatuum inter eandem Romanam ecclesiam ac nos super negotio regni Sicilie hactenus habitorum, suum animum firmiter dirigens, de fratrum suorum consilio et assensu, nuper difiniverit et ordinaverit prefatum negotium in persona nostra fore complendum, et acceptata a nobis ordinatione ab ipso facta super senatus articulo que inserta est in apostolica pagina, hujusmodi diffinitionem et ordinationem super eodem regni negotio editas continente; que utique pagina est ipsius domini et fratrum suorum subscriptionibus suaque bulla et eorumdem fratrum sigillis ad perpetuam memoriam roborata, et factis et impletis per nos que in eadem ordinatione facta super articulo senatus habentur, necnon et acceptatis aliis que in ipsa pagina continentur, et super acceptatione hujusmodi exhibitis a nobis nostris patentibus et autenticis litteris totum tenorem ejusdem pagine continentibus, venerabili patri domino S., tituli Sancte Cecilie presbitero cardinali, Apostolice Sedis legato, vel alii persone quam ad hoc idem summus pontifex duceret deputandam, dictum regnum esse concedendum nobis sub conditionibus annotatis in eadem pagina, nosque vocandos et certum terminum nobis fore prefigendum ab eo, quem jam nobis assignavit, videlicet festum beatorum apostolorum Petri et Pauli primo venturum, ut nos infra eundem terminum pervenientes ad Apostolicam Sedem, de manibus ejusdem summi pontificis, si, propiciante Deo, inveniemus eum vivum, alioquin de manu illius quem eidem in apostolatus officio invenerimus substitutum, aut a collegio cardinalium predicte Romane ecclesie, si (quod absit!) forte vacaret, et recipiamus sub ipsis conditionibus dictum regnum, ut sic in omni eventu sive videlicet tunc prout Domino placuerit idem summus pontifex vixerit sive non, perficiatur in persona nostra prefatum negotium, et ipsius regni concessio nobis fiat. Cum et idem summus pontifex decreverit quod nobis acceptantibus predictam et sicut premissum est nostras super hoc litteras concedentibus ac arripientibus iter ad Sedem Apostolicam personaliter veniendi, prefatus cardinalis de obventionibus decime ecclesiasticorum proventuum quas collegit et colliget congruum nobis subsidium subministret, prout hec omnia et alia in predicta pagina plenius continentur, ad universitatis vestre notitiam volumus pervenire quod nos habentes in hoc ad Deum, de cujus manu suscepimus quod vivimus et quod sumus, necnon et ad modernum statum ecclesie ac ad libertatem fidelium dicti regni, qui sub jugo Pharaonis servitutis miserabiliter opprimuntur, et etiam ad honorem nostrum provida consideratione respectum, ac cupientes propter hoc dictum negotium ad laudem et gloriam divini nominis, quietem et pacem ipsius ecclesie, bonum et prosperum dictorum fidelium statum celeriter et efficaciter consummari, cum prumpta mentis sinceritate approbamus et acceptamus per totum diffinitionem et ordinationem ab ipso summo pontifice super predicto regni Sicilie negotio editas, necnon et ordinationem ab ipso factam super senatus articulo que in predicta pagina est inserta, et alia universa et singula que in ipsa pagina continentur; ac promittimus nos facturos et impleturos omnia que habentur in diffinitione et ordinationibus et pagina supradictis. Promittimus et nos predictum regnum sub conditionibus que annotate sunt in eadem pagina recepturos. Ut autem hujusmodi nostra approbatio, acceptatio et promissio illibate perpetuo maneant, et inconcussam semper obtineant firmitatem, has nostras patentes et autenticas litteras totum tenorem predicte pagine continentes exinde fieri fecimus, nostro ac venerabilium patrum Dei gratia archiepiscopi Aquensis, et episcopi Avinionensis tunc presentium, sigillis ad perpetuam memoriam roboratas. Tenor autem predicte pagine hic est: «Clemens», etc. Actum est hoc tractatus (sic) omnibus suprascriptis et expositis in vulgari, in domo fratrum milicie Templi de Aquis, in camera venerabilis patris domini S. tituli Sancte Cecilie presbiteri cardinalis, Apostolice Sedis legati, et presencia archiepiscopi et episcopi predictorum, necnon ejusdem domini legati ac venerabilium patrum archiepiscopi Cusentini et ... Sistaricensis episcopi, et reverendi viri magistri P. domini pape notarii; Johannis, decani Meldensis; Guillelmi, archidiaconi in ecclesia P[ar]isiensi; Gaufridi de Bellomonte, cancellarii Baiocensis; Johannis de Monciaco, P[ar]isiensis; magistri Girardi de Bampilione, Senonensis; magistri Lamfranci de Turre, Pergamensis; Stephani de Sancta Maria, Massiliensis canonicorum; et Johannis de Breasilva, militis. Ad cujus nichilominus majoris roboris firmitatem, predicti legatus, archiepiscopus Cusentinus, Sistaricensis episcopus et notarius, sigilla sua ad instanciam nostram presentibus appenderunt. Anno Domini millesimo ducentesimo sexagesimo quinto, pontificatus supradicti domini Clementi[s] pape IIII^ti anno primo, pridie kal. maii.