Venerabili et religioso priori Sancti Porciani, Claromontensis diocesis, judici a domino papa delegato, frater P., miseratione divina humilis abbas Mauziacensis, salutem in Domino. Noveritis quod nos constituimus, facimus procuratorem nostrum et ordinamus karissimum fratrem nostrum P. Alardi, monachum, latorem presentium seu exhibitorem, in causa seu in causis quam seu quas nos movemus seu movere intendimus auctoritate predicta coram vobis contra Bertrandum Ducherii, Johannem de Corteys, Guillelmum Achardi, Stephanum et Amblardum de Chalunt(?), P. de Silva, Willelmum de Spinassa, Bernardum Seguini, Willelmum de Monte Floro, Golferium Buysson, Will. Saturnini, Johannem Blancherii, J. Girardi, Bernardum qui vocatur Guinamant, Michaelem de Aqua Sparsa, dictum Jaymundet, monachos Mauziacensis monasterii, et contra alios monachos ejusdem monasterii qui colligationem fecerunt seu fecisse dicuntur inter se contra nos, et qui competenter a nobis moniti proprium quod habebant in nostris manibus noluerunt resignare. Damus etiam eidem procuratori liberam ac plenariam potestatem ac speciale mandatum agendi, proponendi, defendendi, excipiendi, defendendi, et defendendi (sic) confirmationem sententiarum latarum a nobis in monachos supradictos; ratum et firmum habentes quicquid per dictum procuratorem nostrum coram vobis in dictis causa seu causis quantum ad diem jovis post instans festum Omnium Sanctorum nobis et parti adverse apud Sanctum Porcianum coram vobis vel certo mandato vestro assignatam, si absentes fueritis, actum fuerit seu eciam procuratum; promittentes sub ypotheca bonorum nostrorum, si necesse fuerit, judicatum solvi. Et hoc vobis et parti adverse significamus per presentes litteras sigillo nostro sigillatas in testimonium veritatis. Datum die sabbati ante dictum festum [Omnium Sanctorum], anno Domini M^o CC^o LX^o sexto. (Le sceau manque)