Nos Guichardus, Dei gratia Matisconensis episcopus, notum fa[ci]mus universis presentes litteras inspecturis quod Raynerius et Joc[e]rannus de Marziaco, domicel[l]i, fratres, in nostra propter hoc presentia constituti, confitentur et recognoscunt se in feodum accepisse a venerabilibus et religiosis viris Yvone, abbate, et conventu Cluniacensi et successoribus eorumdem domum suam fortem que de Curciaco vulgaliter {corr: vulgariter} nuncupatur, cum ipsius domus appendiciis universis necnon in (sic) aliquid habent, tenent, possident vel quasi possunt in parrochiatu de Ygiaco et de Domange, in hominibus, talliis, domibus, terris, pratis, nemoribus, pascuis, aquis, aquarum decursibus, justiciis, dominaturis, possessionibus ac juribus aliis quibuscunque ac quocunque nomine censeamus, asserentes et jurantes ad sancta Dei euvangelia coram nobis se domum predictam, ipsius appendicias cetera[s]que res superius nominatas a nemine tenere vel accepisse in feodum ab aliis seu aliqua de predictis, de omni evictionis periculo se heredesque suos ipsis abbati et conventui et eorum successoribus specialiter obligando. Confitentur etiam et recognoscunt domicelli predicti ... predictos abbatem et conventum in compensationem acceptionis feodi memorati donasse eisdem et feodum concessisse ann[u]um canonem terrarum, terras et terragium que iidem abbas et conventus vel eorumdem domus de Perrone, de Berziaco Villa et Monte Medio habent et percipere consueverunt prope domum de Curciaco supradictam, videlicet a foresta Guichardi de Marziaco, domicelli, et a quodam loco qui dicitur Arenaria usque ad eandem domum de Curciaco et domum Bernardi de Brueria, militis, in terris predictis retenta decima ipsi abbati et conventui et domibus antedictis. Asserunt etiam coram nobis et jurant ad sancta Dei euvangelia domicelli predicti quod, annuo canone et terragio predictis et hiis que predicti abbas et conventus et eorumdem domus predicte ibidem percipere con[su]everant exceptis, in ipsorum abbatis et conventus seu dictarum domorum homines terras tenentes predictas ac terris (?) eisdem nichil sibi vendicabunt in posterum vel etiam reclamabunt nisi de ipsorum hominum procederet voluntate, promittente[s]que sub eodem juramento abbati et conventui necnon et heredibus antedictis se ipsorum abbatis et conventus eorumdemque successorum et non alterius juditium subituros, quecunque et quocienscunque inter ipsos et homines predictos super terris, annuo canone et aliis predictis emerserit aliquid questionis; promittentes etiam per prestitum coram nobis corporaliter sacramentum, etc. Renunciaverunt insuper in hoc facto domicelli predicti, per prestitum coram nobis corporaliter sacramentum, beneficio restitutionis in integrum, doli, in factum exceptionibus ac omni alii juris auxilio et beneficio canonici et civilis sibi competenti vel deinceps competituro. In cujus rei testimonium, ad predictorum domicellorum instanciam et petitionem, presentes litteras supradictis abbati et conventui tradidimus sigilli nostri munimine roboratas. Actum et datum anno Domini M^o CC^o LX^mo sexto, mense novembris.