Nos Guichardus, Dei gratia Matisconensis episcopus, notum facimus universis, quod Guillelmus Sauvages, domicellus, in nostra propter hoc presencia constitutus, confitetur se in feodum accepisse a venerabilibus et religiosis viris Yvone abbate et conventu Clun. ipsorumque successoribus in futurum, domum suam quam habet in parrochia de Tramays, ac quicquid habet, tenet, possidet, vel quasi per se vel per alium, tenere, possidere, vel quasi potest in parrochiatu eodem, in domibus, terris, pratis, vineis, nemoribus, pascuis, aquarum decursibus, molendinis, hominibus, talliis, justiciis, dominaturis ac possessionibus seu juribus aliis quibuscumque et quocumque nomine censeantur, eo de Chavenes excepto, quod tenet a Gaufrido de Germoles, milite, eo etiam tenemento excepto quod habebat quondam Stephanus de Sarrereis, domicellus, apud Romaigne, et quod nunc tenet dictus Guillelmus Sauvages tutorio nomine, pro Ysabella filia et herede Stephani antedicti; de quo etiam tenemento pro Ysabella eadem feodum nobis fecit Guillelmus Sauvages predictus. Asseruit idem Guillelmus coram nobis, et predictis abbati et conventui promisit predicta, que ab eis accepit in feodum, esse valoris et extimationis viginti librarum Viennensium, nec se accepisse ab ullo alio in feodum eadem seu aliquas de eisdem, se heredesque, successores suos, necnon et eorumdem bona dictis abbati et conventui [et] successoribus eorumdem de omni evictionis periculo specialiter obligando. Pro predicta siquidem feodi acceptione confessus est coram nobis domicellus predictus se habuisse ab abbate predicto XXX libras Viennensium, et in numerata pecunia recepisse; promittens ipsis abbati et conventui, per prestitum juramentum coram nobis cor[por]aliter, quod contra predictam feodi acceptionem seu in ipsius prejudicium quicquam in posterum nullatenus acceptabit. Renunciavit etiam in hac parte domicellus predictus per prestitum coram nobis ad sancta Dei euvangelia juramentum, non numerate pecunie, doli et in factum exceptionibus, beneficio restitutionis in integrum ac omni alii juris auxilio sibi competenti vel deinceps competituro. In predictorum siquidem testimonium et munimine, ad supradicti domicelli petitionem et instanciam, sigillum nostrum presentibus litteris duximus apponendum. Actum et datum anno Domini M^o CC^o LX^o VI^o, mense novembris.