Nos Guichardus, Dei gratia Matisconensis episcopus, notum facimus universis presentes litteras inspecturis, quod in nostra propter hoc presentia constituta Ysa[be]lla de Vallibus, domicella, uxor quondam Petri de Sancto Mauricio, confessa est se accepisse in feodum a venerabili et religioso viro Yvone, Dei gratia abbate Cluniacensi et ecclesia, res, possessiones et jura inferius nominata, videlicet domum suam sitam in villa Vallium desuper Ayona, et vineam suam, condaminam suam de Laili, terram suam de Champiaz, terram de Chaillo, la Belouse subtus Brociam de Lailli, terram de la Rocheta, terram subtus rocham de Vauz, Lespineta, terram de Mololers, condeminam d'Estaveal, condeminam de Monte Argo, Pratum Novum, nemus quod vocatur la Mars, nemus quod dicitur Layes, pratum de Varenna, Pratum Longum, pratum de Condemina des Noera, lo Dueil de Vauz, terram del Chenever, terram del Closege, terram de Grefet, terram de Clauso, terram del Chasteignier, terram de Fontenailles et terram suam de Magno Campo et quicquid juris, possessionis, rationis eadem Ysabella habet, possidet, habere vel possidere potest in villa Vallium vel in parrochia de Aziaco, salva decima quam predicta Ysabella tenet in feodum ab Hugone de Vilers, domicello, et salvo suo cultilli sito in villa Vallium juxta domum Beatris, et inde fecit homagium predicto abbati Cluniacensi; et deinceps [tam] Ysabella quam ipsius heredes tenentur facere homagium dicto abbati suisque successoribus, qui pro tempore fuerint in dicta ecclesia et fidelitatem servare. Promisit insuper dicta Ysabella per prestitum coram nobis juramentum super sancta Dei euvangelia corporaliter sacramentum (sic), hanc feodationem per se et suos fideliter tenere et inviolabiliter observare nec contra per se vel per alium in futurum venire, immo perpetuo contra omnes garantire. Juravit etiam dicta Y. ad sancta Dei euvangelia quod ab alio ante non tenuerat nec teneba[t] in casamento vel feodo res superius nominatas; promittens eadem Ysabella pro se et suis successoribus omnia premissa firmiter observare et contra quemcumque alium predicto abbati et suis successoribus garantire. In cujus rei testimonium, ad instantiam dicte Ysabellis, sigillum nostrum duximus presentibus apponendum. Datum et actum anno Domini M^o CC^o LX^o VI, mense februarii.