CCE: cartae cluniacenses electronicae
Database of the Charters of the abbey of Cluny (802-1300)

BB 5132     View  [Back]
Litteræ quibus Johannes, subprior, et conventus Monasterii Novi notum faciunt Cluniacensi abbati se electionem fecisse Guillelmi, prioris de Faya Monachali, in abbatem.
Sanctissimo patri suo et domino Cluniacensi, devotissimi filii sui frater Johannes, subprior, et conventus Novi Monasterii Pictavensis, Cluniacensis ordinis, salutem et tam debitam quam devotam obedienciam, cum omnimoda reverencia et honore. Vestre paterne clementie benigniter et humiliter intimamus, quod, post petitam et obtentam a vobis licenciam eligendi, vocatis generaliter fratribus nostris qui fuerant evocandi, presentibus omnibus qui debebant, volebant ac comode poterant interesse, invocata primo cum magna devocione gratia sancti Spiritus, die veneris in crastino octabarum Sancti Mathie apostoli, ad electionem in nostro monasterio celebrandam, quasi per inspiracionem, cum Dei adjutorio processimus in hunc modum: nam omnes communiter et unanimiter consensimus in fratrem Guillermum, priorem prioratus de Faya Monachali, nostro subjecti monasterio, ipsumque communiter et unanimiter omnes elegimus in patrem, pastorem et abbatem nostri monasterii memorati, quem firmiter novimus virum litteratum, maturum, prudentem, providum, idoneum et discretum, et a longis temporibus regularibus observanciis assuetum. Ipse siquidem accedit ad vestre sublimitatis prudenciam, sicut decet; nosque mittimus cum eodem fratrem Heliam, prepositum monasterii nostri, fratrem Guillermum, priorem prioratus nostri de Boeto, fratrem Jordanum, priorem prioratus nostri de Essartis, fratrem Aymericum, priorem prioratus nostri de Argentonio, qui presentes omnibus adfuerunt, ut possitis per ipsos de forma et processu electionis intelligere [plena]riam veritatem. Insuper vestre magnificencie, cum quanta majori devotione possumus, humiliter supplica[mus, ut] dictum fratrem Guillermum, priorem prioratus nostri de Faya Monachali, a nobis canonice sic electum, ex vestra beni[gnissima] pietate clementer confirmare velitis. Rursus predictos fratrem Heliam, prepositum, et fratrem Guillermum, priorem prioratus nostri de Boeto, ponimus loco nostri procuratoresque nostros facimus ad hoc, ut ejusdem confirmacionem electi a vestre celsitudinis benignissima pietate postulent et requirant. Nostris etiam supplicationibus devote et humiliter duximus adjungendum, ut de vestra clementi confirmacione per vestras patentes litteras nobis noticiam et certitudinem vestri gratia faciatis, ita quod eidem confirmato a vobis exibeamus obedientiam et reverentiam, ut tenemur. In quorum omnium predictorum certitudinem et noticiam pleniorem, sigillum nostrum, quo unico utimur, presentibus litteris duximus apponendum. Datum die sabbati post octabas jam dicti Sancti Mathie apostoli, anno incarnacionis Dominice millesimo ducentesimo sexagesimo sexto.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung