Petrus Thincti, canonicus Aniciensis, judex seu executor subdelegatus a reverendo in Christo patre domino Guillelmo, Dei gratia Aniciensi episcopo, judice seu executore a Sede Apostolica delegato super confirmationem cujusdam sententie excommunicationis latam per reverendum in Christo patrem dominum Yvonem, abbatem Cluniacensem, in religiosum virum Petrum, Mauziacensis monasterii abbatem, Clarom. diocesis, capellanis, curatis, vicariis necnon aliis ecclesiarum rectoribus ejusdem diocesis, ad quos presentes littere pervenerint, salutem in Domino Jesu Christo. Cum dictus Petrus, abbas Mauziacensis, diu sustinuerit sententiam excommunicationis latam a nobis in ipsum, ad instanciam prioris de Gensac, procuratoris dicti domini abbatis Cluniacensis, ob ipsius contumaciam, et adhuc sustineat animo indurato, claves ecclesie contempnendo, et cum crescente contumacia crescere debeat et pena, vobis universis et singulis, auctoritate qua fungimur in hac parte, in virtute hobediencie et sub pena excommunicationis quam in vos in hiis scriptis ferimus, si mandatum nostrum, immo pocius apostolicum, distuleritis vel neglexeritis adimplere, districte precipiendo mandamus quatinus dictum Petrum, abbatem Mauziacensem, singulis diebus dominicis et festivis, pulsatis campanis et extinctis candelis, in vestris ecclesiis nuncietis excommunicatum publice, alta voce, ita quod a vestro populo valeat exaudiri; mandatum autem nostrum, immo pocius apostolicum, taliter impleturi ut non possitis de inobediencia seu negligencia redargui seu puniri. In exequendo autem mandato nostro alter vestrum alterum non expectet. Et insuper precipimus tibi, Vitali Chapa de Casa Dei, clerico, auctoritate sacrosancte Romane ecclesie publico notario, qui in prolatione hujusmodi sentencie presens interfuisti, ut de hiis que in presentibus litteris continentur conficias publicum instrumentum. Datum Anicii, III^o idus julii, anno Domini M^o CC^o LX^o VIII^o, indictione prima, pontificatus domini Clementis pape quarti anno quarto, presentibus testibus ad hoc specialiter evocatis et rogatis, domino Poncio de Ronvilla, canonico Aniciensi, et Hugone Delcher, clerico chori ecclesie Aniciensis, et Johanne Daler et Simeone Delobra, laicis. Reddite litteras sigillis vestris appositis in eisdem in signum executi mandati. (Suit la formule notariale. Il ne reste qu'un sceau à peu près fruste)