Nos Hugues, dux de Borgoigne, faisons asavoir à touz ceaus qui verront ces presantes leitres que en nostre presance por ce establiz Girarz de Manlé, escuyers, requenoit et dit par devant nos que il ha vandu et quité au prior de Meyvre et à l'eglise de celui lieu une soye meyson assise sus la porte dou chastiau de Manlé dedanz les foussez, qui toiche à la mayson Veicear, d'une part, et d'austre part, de lez la mayson au Torneor, por quarante livres de Vienois, la quele mayson estoit et movoit de nostre fié, ansinc cumme cil Girarz dit. La quele vandue devant dite nos lohuns et otreons au prior et à l'eglise de Mevre et quitons et otreons au prior de Meyvre et à l'eglise dou dit leu le fié que nos havions an la mayson devant dite. En tesmoing de la quel chouse, nos havons pousé nostre seal en ces presentes leitres. Ce fu doné en l'an de grace MCC et LXVIII, ou moys d'aoust.