Nos fratres Guillelmus Achardi, Petrus de Silva, Haymo de Valeris, Johannes de Cortois et Golferius Boissons, monachi Mauziacensis monasterii, Cluniacensis ordinis, Claromontensis diocesis, notum facimus universis presentes litteras inspecturis, quod anno Domini M^o CC^o LX^o nono, mense julii, die veneris post festum apostolorum Petri et Pauli, indictione duodecima et, vacante monasterio Mauziacensi predicto, per liberam resignationem seu cessionem venerabilis et religiosi viri Petri de Ysserpano, quondam abbatis ipsius monasterii Mauziacensis, presentibus omnibus in capitulo ejusdem monasterii qui voluerunt, debuerunt et potuerunt commode interesse, invocata Spiritus sancti gratia, et proposito verbo Domini, placuit omnibus et singulis de conventu dicti monasterii Mauziacensis, per viam compromissi seu commissi providere viduato monasterio de pastore; sicque nobis quinque jam dictis, A. priore, et omnibus et singulis de conventu predicto electis, fuit nobis eligendi seu providendi viduato monasterio ab omnibus et singulis de conventu eodem concessa seu commissa potestas usque ad consumptionem cujusdam candele, que accensa extitit in capitulo supradicto. Nos vero predicti quinque in nos recipientes concessionem seu commissionem predictam, ac secedentes in partem, habito inter nos diligenti tractatu, unanimiter convenimus in religiosum virum donnum Petrum de Firmitate Chauderonis, monachum Cluniacensem. Quo facto, nos G. Achardi, P. de Silva, Haymo de Valeris et Golferius Boissons predicti, concessimus et commisimus Johanni de Cortois, consocio seu compromissario nostro, ut ipse, vice sua et nostra ac omnium de conventu predicto, dictum donnum Petrum de Firmitate eligeret seu postularet eo modo quo magis valere posset, in abbatem dicti Mauziacensis monasterii et pastorem. Et ego Johannes de Cortois predictus, vice mea et quatuor prenominatorum consociorum seu compromissariorum meorum, et omnium de conventu predicto, dictum donnum Petrum de Firmitate eligo vel postulo eo modo quo magis valere potest in abbatem et pastorem Mauziacensis monasterii memorati. In cujus rei testimonium nos G. Achardi, P. de Silva, Haymo de Valeris, Johannes de Cortois et Golferius Boissons predicti presentibus sigilla nostra apposuimus. Actum et datum anno, mense, die et loco predictis. (Fragments de deux sceaux)