Nos Guichardus, Dei gratia Matisconensis episcopus, notum facimus universis presentes litteras inspecturis, quod cum domina Guillermeta, relicta domini Hugonis de la Peurere, militis, haberet, teneret, possideret vel quasi quinquaginta octo solidos et tres denarios Viennenses censuales super hominibus, tailliis, terris, pratis, vineis, aquis et nemoribus in villa et parochiatu de Sancto Poncio sitis, de suo franco alodio, prout dicta domina Guillermeta asserit coram nobis, supradicta domina Guillermeta in nostra propter hoc presentia constituta, sciens, prudens et spontanea vendit, tradit vel quasi, ac titulo pure et perfecte venditionis perpetuo possidendum cedit et concedit venerabilibus et religiosis viris Yvoni, abbati, et conventui Cluniacensi et eorum successoribus in alodium supradictos quinquaginta octo solidos et tres denarios Viennenses censuales et quicquid habet vel habere potest et debet quocunque titulo in parochiatu predicto, precio quinquaginta octo librarum Viennensium, quas dicta domina G. confessa est coram nobis se recepisse et habuisse integraliter a dictis religiosis in pecunia numerata; devestiens se dicta domina G. de predicto servitio, tallia seu censu venditis, etc.; promittens, etc. (usque) obligando. Renuncians insuper in hoc facto dicta domina G. per prestitum juramentum, etc. In cujus rei testimonium, ad preces et instantiam dicte domine Guillermete, sigillum nostrum presentibus litteris duximus apponendum. Datum anno Domini M^o CC^o septuagesimo, mense februarii.