Charta qua Hugo, dominus Berziaci, notum facit se conventionem fecisse cum abbate Cluniacensi super nemore de Bruille, etc.
Nos Hugo, dominus Berziaci et Sancti Germani in Brissia, notum facimus universis presentes litteras inspecturis, quod cum inter nos et reverendum patrem et dominum nostrum Yvonem, Cluniacensem abbatem, questio verteretur super eo videlicet quod idem abbas dicebat ecclesiam Cluniacensem in toto nemore quod vocatur Buille medietatam habere debere, et in alia medietate partem octavam; tandem, amicis communibus mediantibus, de dicta questione seu contentione inter nos est compositum in hunc modum, videlicet: quod ecclesia predicta partem nemoris predicti, prout mete ibidem posite hec designant, et prout idem nemus a predictis metis respicit et protenditur versus nemora de Frasniz et des Sarrées, cum novis et veteribus essartis factis
in eodem vel de eodem nemore et extructis, francam et liberam, cum omni jure, justicia et jurisdictione imperpetuum, habeat sine nostra, heredum, successorum, necnon et hominum nostrorum reclamatione aliqua in futurum. In alia vero totali parte nemoris antedicti, prout a metis predictis respicit et protenditur versus Soloigniacum, jus suum supradictis abbati et ecclesie, tam eorumdem abbatis et ecclesie nomine, quam ex aliorum personis remanet eis salvum. Predictam siquidem dicti nemoris compositionem et divisionem, prout superius sunt expresse, promittimus ad sancta Dei euvangelia pro nobis, successoribusque nostris nos fideliter et perpetuo servaturos, nosque facturos et curaturos quod homines nostri in parte nemoris supradicta ad eosdem abbatem et ecclesiam pertinente nichil juris, usagii seu perceptionis de cetero reclamabunt, vel in parte eadem ipsos aliquatenus molestabunt. In cujus rei testimonium sigillum meum presentibus litteris duximus apponendum. Datum anno Domini M
o CC
o septuagesimo primo, mense novembris.
(Trace du sceau) (Au dos:) Domini de Berziaco, de nemore de Bruille(?).