Charta qua quædam femina dicta Compaigne de monasteriis vendidit abbati Cluniacensi quidquid habebat in nemore de Moncrain.
Nos, officialis curie Matisconensis, notum facimus universis presentes litteras inspecturis, quod Compaigne de Monasteriis, pro evidenti necessitate sua, in nostra presentia propter hoc constituta vendit et ex causa emptionis habendum, tenendum, possidendum vel quasi perpetuo tradit et concedit reverendo patri Yvoni, Dei gratia abbati, et conventui Cluniacensi quicquid juris habet vel habere potest aliqua ratione in nemore dicto de Muncrai precio viginti librarum Viennensium, de quo precio confessa est coram nobis sibi satisfactum fuisse ab eisdem abbate et conventu in pecunia numerata. Hanc autem venditionem, traditionem et concessionem Guillelmus, ejus filius, coram nobis voluit, laudavit ac etiam approbavit; promittentes ipsis abbati et conventui per prestitum coram nobis corporaliter sacramentum, quod contra venditionem predictam non venient per se vel per alium, seu contravenire volenti consentire in futurum, et quod quic
quid est nemoris magni vel parvi in terris suis prope nemus predictum de Moncrain adjacentibus nunc sitis, infra quinquennium proximum, destruent et funditus exartabunt, nec in eisdem terris a quinquennio predicto nemus nutrient aut habebunt, se, heredes successoresque suos necnon et omnia bona sua predictis abbati et conventui propter hoc specialiter obligando. Renunciaverunt siquidem in hac parte Compaigne et Guillelmus predicti per prestitum juramentum corporaliter coram nobis, etc. In cujus rei testimonium, ad predictorum Compaigne et Guillelmi petitionem, ad instanciam Guillelmi, nostrum presentibus litteris [sigillum] duximus apponendum. Datum Matiscone, die mercurii post ramos Palmarum, anno Domini M
o CC
o LXX
o primo.