Nos, officialis curie Matisconensis, notum facimus universis presentes litteras inspecturis, quod Guigonetus, quondam filius Petri, prepositi de Chivignes defuncti, nobis humiliter supplicavit ut nos testes qui interfuisse dicuntur ordinationi dicti prepositi et dispositioni ultime quam idem prepositus in lecto egritudinis, de qua ipse decessit, fecisse et ordinasse dicebatur, reciperemus eorumque atestationes in formam publicam redigere curaremus, ne processu temporis eidem Guigoni probationis copia super hoc deperiret. Nos ejusdem Guigonis supplicationi annuentes, testes nobis ab ipso super hoc presentatos, quorum nomina inferius subsecuntur, vocatis primo propinquis et aliis proximis dicti defuncti et illis quorum interesse dicebatur, recepimus diligenterque examinari fecimus eorum depositiones in formam publicam redigi faciendo, quorum nomina et depositiones subsequuntur: dominus Johannes vicarius Prissiaci juratus dixit quod Petrus, quondam prepositus de Chivignes, ita de rebus suis disposuit. Primo eligit sepulturam suam apud Cluniacum, in ecclesia beati Petri. Item legavit dicto Johanni vicario Prissiaci decem et octo solidos pro sepultura et annuale. Item legavit vicario duos solidos. Item in capella cymiterii Prissiaci XII denarios censuales. Item ecclesie Sancti Petri Cluniacensis quinque solidos censuales. Item bonis hominibus de Grangia unum rasonum nucum. Item in hospitali Matisconensi unum rasonum nucum. Item leprosis Matisconensibus sex denarios. Item in opere Sancti Vincentii XII denarios. Item operi Sancti Martini Prissiaci octo denarios. Item in Caritate Prisciaci unum bichonum grossi bladi censuale. Item legavit Petronille, uxori sue, molendinum dou Brueyl cum appenditiis in perpetuum. Item quandam vineam suam juxta grangiam dicti prepositi, usque ad vineam prepositi de Vergisson. Item domum novam sitam juxta puteum et ad vitam. Item quandam domum sitam super lo Terrayl et curtile ante domum ad vitam; ita quod post ipsius decessum dicta domus sita super Terrayllum deveniad ad liberos Bernardi, filii dicti prepositi non maritatos. Item liberis dicti Bernardi legavit de melioramento quandam domum sitam juxta domum dou Terrail et medietatem molendini de Ponte et sex libras quas habebat supra dictum molendinum, exceptis maritatis. Item predictis liberis quandam vineam sitam apud Charnay, omnibus communiter tam uxoratis quam non uxoratis et tres mitteratas terre sitas apud Charnay. Item legavit de melioramento Guigoneto filio suo molendinum Vignant cum appenditiis, coquinam et duas cameras sitas inter coquinam et illam juxta torcular et preposituram de Chivignes. Item ipsum Guionetum heredem suum instituit. Item legavit domno Stephano filio suo, curato de Juyllaco, quandam vineam sitam in manso Brueri. Item quatuor mitteriatas terre sitas inter terram Roser et liberorum de Planteis. Item quatuor mitteriatas terre sitas en les Belouses. Item quoddam pratum quem emit ab uxore Stephani Pelleterii. Item quoddam pratum de la Palice situm juxta pratum Petri de Bulent et Bernardi Lannes. Item quamdam domum quam emit a Guillelmo dicti Fatuo et de istis ipsum heredem suum instituit, ita quod in aliis rebus nichil possit reclamare. Item Anthonie, filie sue, legavit quandam vineam sitam apud lo Davaynier Escurcie usque ad vineam Johannis Roser. Item domum quam habuit a Guillelmo lo Fol. Item quamdam vineam sitam apud Monthanum juxta vineam Basin et Hugonis de La Rue. Item confessus fuit quod habuit in maritagio sexdecim operatas vinee sitas en les Plantes et quoddam curtile situm ou Breuil. Item quandam peciam terre sitam super pratum de Pallicia. Item illud quod tenent li Chem apud Prissiacum et ipsam in istis heredem suum instituit et voluit ipsam esse contentam, ita quod non possit in aliis rebus aliquid reclamare. Item liberis Johannis de Baugiaco legavit quandam peciam terre sitam en Perreis juxta terram liberorum Johannis de Corba. Item legavit a la Mavigaylli quandam peciam terre sitam en Belouze juxta terram Johannis Leraubes. Item Bartholomeo servienti suo legavit quandam peciam terre sitam en Rochi, quam Nicholaus tenet. Omnia autem mobilia et immobilia que non legavit dedit et legavit Guioneto filio suo et liberis dicti Bernardi, filii sui, qui non sunt uxorati, et voluit quod ipsi persolvant et pacificent debita sua per manus executorum suorum, scilicet domni Johannis vicarii Prisciaci et Aymonis de Prissiaco clerici. Requisitus quomodo scit, dixit quod ipse fuit presens ad hoc vocatus et rogatus cum aliis testibus subsequentibus. Requisitus si dictus prepositus erat sane mentis, dixit quod sic. Requisitus si ipsi testes fuerunt presentes ad hoc eodem contextu, dixit quod sic. Requisitus de loco, dixit quod in domo dicti prepositi. Requisitus si ipse ita ordinavit in egritudine de qua decessit, dixit quod sic. Requisitus de tempore, dixit quod die precedenti vigiliam beati Martini yemalis proximo preteritum et quod ipse fuit deportatus mortuus ad ecclesiam in eodem festo beati Martini yemalis. Aymonetus de Prissiaco, clericus, requisitus dixit idem in omnibus. Johannes de Cumba testis dixit idem in omnibus. Stephanus Bocauz testis dixit idem in omnibus. Odo de Misiriaco testis dixit idem in omnibus. Nos autem officialis predictus presentibus litteris et publice forme sigillum nostrum apposuimus in testimonium predictorum que acta sunt per nos et coram nobis. Actum ac datum die lune ante Rogationes, anno Domini M^o CC^o septuagesimo secundo. (Reste de sceau en cire brune, et simple queue de parchemin pendant)