Nos magister Cristinus Balduini, archipresbiter Viriseti, notum facimus universis presentes litteras inspecturis, quod Jaquetus de Vallibus, domicellus, et Adelina, uxor sua, in nostra presentia constituti, vendunt, tradunt, cedunt pariter et concedunt religiosis viris ... abbati et conventui Cluniacensi precio quinquaginta solidorum Cluniacensium habitorum et receptorum a predictis viris religiosis, prout ipsi venditores confessi sunt coram nobis, quicquid juris, actionis, usagii et dominii habent vel habere possunt in nemore de Nolondon et in dicto Bochant, cum appertinenciis rerum predictarum. Promiserunt siquidem predicti conjuges per juramentum suum super sancta Dei evangelia coram nobis corporaliter prestitum, se contra dictam venditionem per se vel per alium de cetero non venturos, nec fecisse nec facturos aliquid quominus ista venditio robur obtineat perpetue firmitatis, se et sua de evictionis periculo predictis religiosis viris abbati et conventui nichilominus obligarunt; renunciantes in hoc facto omni exceptioni non numerate et non habite pecunie, doli et in factum, benefitio restitutionis in integrum omnique juri in favorem mulierum introducto, juri dicenti: generalem renunciationem non valere, et omni juri canonico et civili. In cujus rei testimonium, ad preces et instantiam predictorum conjugum, sigillum nostrum presentibus apposuimus. Datum anno Domini M^o CC^o LXX^o tercio, mense junii.