CCE: cartae cluniacenses electronicae
Database of the Charters of the abbey of Cluny (802-1300)

BB 5199     View  [Back]
Charta qua Guido Blecheti vendidit abbati Cluniacensi domum suam apud Sanctum Jangulfum.
Nos Gaufridus, officialis et canonicus Cabilonensis, notum facimus universis presentes litteras inspecturis, quod dominus Guido Blecheti de Sancto Jangulpho, presbiter, in nostra propter hoc presentia constitutus, sciens, prude[n]s et spontaneus, et ex causa pure et perfecte venditionis tradit, cedit pariter et concedit venerabilibus et religiosis viris Yvoni, Dei gratia abbati Cluniacensi, et conventui ejusdem loci ac eorum successoribus imperpetuum quandam domum suam sitam apud Sanctum Jangulphum, ante ecclesiam, inter domum predictorum abbatis et conventus, ex una parte, et domum Morelli Durandet, ex altera, precio viginti quinque librarum Cluniacensium, quas dictus Guido, presbiter, confitetur in judicio coram nobis se recepisse et habuisse integraliter a predictis religiosis abbate et conventu in pecunia numerata; promittens dictus Guido, presbiter, pro se et suis, per juramentum suum coram nobis super sancta Dei euvangelia corporaliter prestitum, se per se vel per alium contra dictam venditionem de cetero non venturum, seque facturum quod eosdem abbatem et conventum suosque successores, sub ypotheca bonorum suorum ubicunque existentium, eandem domum cum pertinentiis ejus habere licebit in perpetuum et pacifice possidere, et eosdem emptores et suos [successores] contra quascunque personas in jure et extra jus, si (quod absit!) super eadem domo et pertinenciis questionem moveri contingeret, suis propriis sumptibus deffensurum, sed et omnia bona sua, presentia et futura, dictis religiosis emptoribus et eorum successoribus de evictionis periculo nichilominus obligando. Renunciat insuper in hoc facto coram nobis dictus Guido, ex certa scientia et per juramentum, etc. Volens dictus Guido per juramentum quod tantum valeat quoad hoc renunciatio generalis, quantum quelibet specialis de [qua] oporteret hic fieri plenam et expressa[m] mencionem. In cujus rei testimonium, ad supradicti domini Guidonis, presbiteri, petitionem et instanciam, sigillum curie Cabilonensis presentibus duximus apponendum. Datum anno Domini Mo ducentesimo septuagesimo quarto, mense augusti.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung