CCE: cartae cluniacenses electronicae
Database of the Charters of the abbey of Cluny (802-1300)

BB 5204     View  [Back]
Litteræ quibus monachi de Caritate recognoscunt subjectionem suam erga abbatem Cluniacensem qui eis Simonem de Hermenteriis in priorem dat.
Universis presentes litteras inspecturis, fratres Yvo, Sancti Martini de Campis Parisiensis, Petrus, Sancti Pancracii Lewensis, Petrus, Sancti Arnulphi de Crispeio, Odo, de Choisiaco prioratuum priores; Johannes, supprior, Nicholaus, sacrista, Hugo, camerarius, et Philippus, cantor dicti prioratus Sancti Martini, salutem in Domino. Noveritis quod anno Domini millesimo ducentesimo septuagesimo quarto, die mercurii ante dominicam in Ramis palmarum, videlicet IIIo non. aprilis, Parisius, in predicto prioratu Sancti Martini, in aula magna infirmarie, reverendus in Christo pater donnus Yvo, Dei gratia abbas noster Cluniacensis, nobis prenominatis cum aliis multis religiosis et secularibus vocatis presentibus, ac nuntiis religiosorum virorum supprioris et conventus de Caritate super Ligerim, scilicet Roberto, de Montigniaco, Thoma, de Conada prioribus; Roberto, succelerario, et Petro, infirmario Caritatensi, qui ex parte ipsorum supprioris et conventus, pro habendo priore, ad ipsum donnum abbatem venerant, specialiter vocatis, et in ipsius donni abbatis presentia constitutis, idem donnus abbas, dando eis priorem, verbis usus est que secuntur: «Venerabilibus et karissimis fratribus nostris ... suppriori et conventui domus de Caritate, ad presens priore vacante, quam menbrum nobile ecclesie Cluniacensis inter cetera ipsius ecclesie menbra affectu sincere dilectionis amplectimur, desiderantes personam dare ydoneam in priorem, que tam in spiritualibus quam temporalibus dicte domus de Caritate personis et loco salubriter atque utiliter tanquam prior preesse valeat et prodesse, communicato quorumdam seniorum tam Cluniacensium quam Caritatensium consilio, singulariter in secreto ac intra nos deliberatione habita diligenti, dictis suppriori et conventui vobisque suis nunciis damus in priorem de Caritate venerabilem et karissimum fratrem nostrum, Symonem de Hermenteriis, camerarium Cluniacensem et priorem Coinssiacensem.» Quo audito, prenominati nuncii et nonnulli priores domui de Caritate subditi, presentes ad pedem dicti donni abbatis venerunt, sibi grates devote et humiliter referentes. In quorum memoriam et testimonium, nos predicti ... Sancti Martini de Campis, ... Sancti Arnulphi, ... de Choisiaco priores, supprior, sacrista, camerarius et cantor Sancti Martini, sigilla nostra, nosque prior Sancti Pancracii, quia propter novitatem institutionis nostre in dicto prioratu Sancti Pancracii Lewensis sigillum nomine prioris Lewensis nundum habemus, sigillum quo nomine prioris Silviniacensis, dum administrationem prioratus Silviniacensis gessimus, utebamur, presentibus litteris duximus apponenda. Datum Parisius, anno et die predictis. (Traces de huit sceaux)
(Au dos:) Littera electionis prioratus de Caritate.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung