Nos frater Garnerius, humilis decanus Cluniacensis, notum facimus universis presentes litteras inspecturis, quod magister Stephanus de Vergeçon, canonicus Matisconensis, in nostra propter hoc presentia constitutus, permutat et ex causa permutationis tradit, cedit et concedit pratum suum cum ipsius prati onere censuali, situm juxta pratum decanatus nostri quod dicitur de Ulmo, reverendis patribus nostris Yvoni, abbati, et conventui Cluniacensi, cum quadam ipsorum abbatis et conventus vinea in territorio Jaloniaci sita, a Laisarable, juxta vineas Johannis de Milliaco et Petri Bordelini defuncti; recipiens idem Stephanus ab eisdem abbate et conventu, ex causa permutationis predicte, eandem vineam pro duodecim denariis Cluniacensibus annuatim canonis sive census, domui Jaloniaci in festo beati Martini hyemalis reddendis, liberam ab omni censu alio antiquo, quarto, decima, quolibet onere alio, toto tempore vite sue. Post ipsius vero decessum heredes seu successores ipsius Stephani, cum solo onere dictorum duodecim denariorum et decima ipsius vinee, prout in dicta permutatione est actum, ipsam vineam tenebunt in perpetuum et habebunt. Promisit siquidem dictus Stephanus predictis abbati et conventui per prestitum coram nobis corporaliter sacramentum quod contra permutationem predictam non veniet per se vel per alium, aut contravenire consenciet volenti in futurum, seque facturum et curaturum quod ipsos abbatem et conventum, ex causa permutationis predicte, dictum pratum habere licebit in perpetuum et pacifice possidere de omni evictionis periculo se et heredes suos ipsius specialiter obligando. Renunciavit autem idem Stephanus in hac parte per prestitum coram nobis ad sancta Dei evangelia juramentum, permutationis legitime non facte, doli et in factum exceptionibus ac omni alii juris benefitio sibi competenti vel deinceps competituro. In cujus rei testimonium, ad ipsius Stephani petitionem et instanciam, sigillum nostrum duximus presentibus apponendum. Actum anno Domini M^o CC^o septuagesimo septimo.