Nos magister Jacobus, clericus baillivi Matisconensis, tenens castellaniam Sancti Jangulphi, et magister Stephanus de Vergiçon, canonicus Matisconensis et curatus ecclesie Sancti Jangulphi, notum facimus universis presentes litteras inspecturis, quod Guido Pelars de Sancto Jangulpho et Hugueta, uxor ejus, ac Perronella, soror dicti Guidonis, in nostra propter hoc presentia constituti, scientes, prudentes et spontan[e]i, vendunt, tradunt, cedunt pariter et concedunt venerabilibus et religiosis viris Yvoni, Dei gratia abbati Cluniacensi, et conventui ejusdem loci ac eorum successoribus in perpetuum res et jura que inferius continentur: videlicet VI jornalia terre sita apud Colonges subtus Sanctum Bauderium; item unum bichetum frumenti annui servicii, quod debent eis filii Rufe et pares eorum; item terciam partem unius sextarii vini servitii; item terciam partem quarte partis de decem et octo operaturis vinee; item terciam partem septem gallinarum servicii; item terciam partem duarum peiarum et terciam partem unius corveie sex boum; item jus quod habet in una charrata feni in prato subtus Fontem; item terciam partem mansi Vincentii Judei; item terciam partem Haymonis de Colonges; item unum boysselum avene servitii et omnia alia que habebant et participabant dicti venditores cum Bernardo et Reberto de Flaie et Duranno Maiginii, precio XII^cim librarum Viennensium, quas dicti venditores confitentur coram nobis se recepisse et habuisse integraliter a religiosis viris emptoribus in pecunia numerata; de quibus rebus et omnibus aliis universis et singulis supradictis venditis dicti venditores ex causa dicte venditionis se devestiunt coram nobis et dictos emptores investiunt vel quasi de eisdem in vacuam et corporalem possessionem inducendo, cedentes et concedentes ex causa dicte venditionis dictis emptoribus et suis et in eos penitus tra[n]sferentes dicti venditores ex causa predicta omnia jura, etc.; promittentes dicti venditores, etc. Renunciant, etc. In cujus rei testimonium nos predictus Jacobus sigillum castellanie curie Sancti Jangulphi et nos magister Stephanus sigillum ecclesie Sancti Jangulphi, ad preces et instanciam dictorum venditorum, presentibus duximus apponendum. Datum anno Domini M^o CC^o septuagesimo septimo, mense januarii.