In nomine Domini. Amen. Anno incarnationis ejusdem millesimo ducentesimo septuagesimo septimo, mense februario, nos Bernardus de Villa Bicheti et Sybilla, ejus uxor, notum facimus universis presentes litteras inspecturis, quod nos non decepti, nec coacti, sed spontanea voluntate vendimus, concedimus et quittamus in perpetuum, venditione irrevocabili, viris religiosis abbati et conventui Clugniacensi medietatem unius pecie vinee continentem tria jornalia, sitam in finagio de Gyvreyo, super magnum cheminum Belnensem, juxta vineam dictorum les Loberens de Sathonay. Item quamdam domum nostram cum fundo, manso et pertinentiis dicte domus, sitam juxta mansum Vioneti Jor, ex una parte, et mansum Perrini Lautain, ex altera. Item peciam vinee subtus torcular de Bese, in Campo Foschie, que est contorium juxta vineam Johannis Arnaut. Item quatuor sextaria vini mustalis super unam peciam vinee en Varcilles, juxta vineam capituli Lingonensis, ex una parte, et vineam Girardi Fevrier, ex altera. Item dimidium jornale terre in finagio de Gevreyo, subtus crucem juxta campum de la Buerie, ex una parte, et terram Legereti, ex altera. Item dimidium jornale terre in campo feu Evrart, juxta campum Perrineti Morin, ex una parte, et campum Stephani de Chemino, ex altera. Item unum jornale es Crais, juxta terram liberorum Gaaigne Bien et terram Alberici Josseaul. Item duo jornalia subtus Lespay, juxta campum Blancheti Recruz. Item duas pecias prati en Marcelote, quarum una est juxta pratum majoris de Givreyo, ex una parte, et pratum liberorum Johannis Lerat, ex altera; alia juxta pratum a la Bruchiesse. Item peciam vinee in finagio de Gevreyo, en Varcilles, juxta vineam domini Gilonis de Gevreyo, ex una parte, et vineam Colini dicti Lorin, ex altera. Item domum nostram apud Givreyum cum fundo, manso et pertinenciis dicte domus, sitam juxta domum Ruffi de Auxona, ex una parte, et mansam dicte Blanche de Vergeyo, ex altera. Et de predictis omnibus et singulis superius nominatis et venditis nos et nostros penitus devestimus et dictos emptores investimus, etc. ... ., et tenemur et promittimus nos predicti conjuges per juramenta nostra data corporaliter super sancta Dei euvangelia, pro nobis et nostris heredibus, quos ad hoc obligamus, et sub obligatione omnium bonorum nostrorum mobilium et immobilium, ubicumque fuerint et quecumque, predicta omnia superius nominata, dictis emptoribus et eorum heredibus sive successoribus garantire perpetuo contra omnes quite et libere, salvis honeribus et censivis; et nos pro eis semper et ubique locorum et in omni curia contra omnes opponere propter hoc et respondere propriis sumptibus nostris, et in nos pro eis littis onus suscipere quamcito vel quocienscunque super hoc fuerimus requisiti, pro centum libris Viennensium, de quibus a dictis emptoribus plenum, perfectum et integrum pagamentum recepimus et habuimus in pecunia numerata, de quibus nos tenemus pro pagatis. Promittentes per juramenta nostra predicta contra dictam venditionem seu contra predicta vel aliquod de predictis non venire, nec contravenienti consentire de cetero, in judicio vel extra judicium, in toto vel in parte, per nos vel per alios, verbo vel facto, seu consensu, sive jure, vel consuetudine, vel modo alio qualicumque; renunciantes in hoc facto nos predicti conjuges per jam dicta juramenta nostra exceptioni doli mali, lesionis vel deceptionis, in factum, dicte venditionis non legitime facte, dicte pecunie non habite et non recepte, omnibus privilegiis in cujuscunque favorem introductis, omni actioni nobis et nostris quantum ad revocandum predicta competenti vel in futurum competiture, omnibus privilegiis in favorem mulierum introductis et omni auxilio tocius juris canonici et civilis, et juri dicenti: generalem renunciationem non valere. Volumusque compelli ad observantiam omnium predictorum quasi ex re adjudicata per curiam domini ducis Burgundie, cujus juridictioni quoad hoc supponimus nos et nostros heredes. In quorum omnium testimonium litteris istis sigillum dicte curie rogavimus et obtinuimus apponi. Actum in presencia Jacobi de Bellovisu, notarii de Nuiz, Johannis de Vogeto clerici, et Guioneti Beaufront de Villa Bicheti, testium ad hoc vocatorum, anno et mense predictis. (Le sceau manque)