Nos Hugo de Vilaribus, miles, ballivus Matisconensis, notum facimus universis presentes litteras inspecturis, quod Gerardus, prepositus de Mont Boton, in nostra propter hoc presentia constitutus, spontaneus, non coactus, ut asserit coram nobis, vendit et titulo pure et perfecte venditionis tradit, concedit, deliberat et in perpetuum quitat pro se et suis, sine reclamatione aliqua in posterum facienda, religiosis viris abbati et conventui Cluniacensi vineam suam sitam in territorio de Mont Rachatz, ut dicitur, juxta vineam predictorum abbatis et conventus, precio sex librarum Viennensium, de quo precio se tenet dictus Gerardus venditor coram nobis plenarie pro pagato; et propter hoc predictus Gerardus venditor se et suos de predicta vinea devestit coram nobis et predictos emptores corporaliter vel quasi investit de eadem, et tenetur et promittit coram nobis predictus venditor, pro se et suis, per stipulationem sollempnem et sub expressa obligatione omnium bonorum suorum mobilium et immobilium ubicumque existentium, et per juramentum suum coram nobis super sancta Dei euvangelia corporaliter prestitum, predictam vineam dictis emptoribus contra omnes propinquos et extraneos perpetuo firmiter garantire et tenere in pace, in judicio et extra judicium, et se pro predictis emptoribus semper ubique locorum et in omni curia contra personas omnes opponere propter hoc et respondere propriis sumptibus et expensis, et facere et prestare quicquid in causa evictionis debet fieri et prestari, et in nullo contraire nec contravenienti aliquatenus consentire. Abrenunciat insuper in hoc facto predictus venditor, ex certa scientia et sub vinculo jam prestiti juramenti, exceptionibus doli mali, lesionis, fraudis, et in factum, non numerate pecunie et non habite nec recepte, venditionis legitime non facte, deceptionis legitime ultra dimidiam justi precii, beneficio restitutionis in integrum et revocationis in futurum, juri dicenti: generalem renuntiationem non valere, et omni juris canonici et civili[s] seu consuetudinarii, quod sibi vel suis posset ad presens vel in futurum competere vel prodesse contra tenorem presentium litterarum. In cujus rei memoriam, ad preces et requisitionem predicti Geraldi venditoris, sigillum commune ballivie Matisconensis presentibus litteris apposuimus in robur et testimonium perpetue veritatis. Actum et datum anno Domini M^o CC^o septuagesimo septimo, mense marcii.