Conservatoria Nicolai papæ III, directa abbati Sanctæ Genovefæ Parisiensis pro revocatione bonorum alienatorum monasterii Cluniacensis.
Nicolaus episcopus, servus servorum Dei, dilecto filio ... abbati Sancte Genovephe Parisiensis, salutem et apostolicam benedictionem. Inclinati precibus dilectorum filiorum ... abbatis et conventus monasterii Cluniacensis, Matisconensis diocesis, presentium tibi auctoritate mandamus, quatinus ea que de bonis ipsius monasterii alienata inveneris illicite vel distracta ad jus et proprietatem ejusdem monasterii studeas legitime revocare, contradictores per censuram ecclesiasticam, appellatione postposita, compescendo. Testes autem qui fuerint nominati, si se gratia, odio vel timore subtraxerint, censura simili, appellatione cessante, compellas veritati testimonium perhibere. Datum Rome, apud Sanctum Petrum, X kal. februarii, pontificatus nostri anno secundo.
(La bulle est perdue)