CCE: cartae cluniacenses electronicae
Database of the Charters of the abbey of Cluny (802-1300)

BB 5275     View  [Back]
Robertus II, dux Burgundiæ, notum facit se concordiam fecisse cum Yvone II, abbate Cluniacensi, qua ei concedit justiciam altam et bassam villæ Gevriacensis et invicem possessionem domus de Trohaudo ad vitam suam recipit.
Nos Robertus dux Burgondie, notum facimus omnibus presentes litteras inspecturis, vel audituris, quod cum inter nos, nostro nomine ex una parte et viros religiosos, fratrem Yvonem, Dei gratia Cluniacensem abbatem, et ejusdem loci conventum, suo et domus sue de Gevreyaco, prope Dyvyonem, Lingonensis dyocesis, nomine ex altera, super possessione vel quasi justicie magne et alte ville sue et territorii de Gevriaco, predicte dyocesis Lingonensis, discordia verteretur; tandem bonis viris mediantibus inter nos et religiosos predictos de dicta discordia concordatum, compositum et pro bono pacis ordinatum est in hunc modum: videlicet quod nos ratione concordie, compositionis et ordinationis predictarum eisdem religiosis, ecclesie sue Cluniacensi et dicte domui sue de Gevriaco damus, concedimus, cedimus, quittamus et tradimus tenendum et possidendum, vel quasi, habendumque perpetuo quicquid habemus, habere possumus et debemus, tam ratione proprietatis quam possessionis vel quasi, in dicta villa de Gevriaco et ejusdem territorio, in hominibus, domibus, mansis, terris, vineis, justicia magna et parva, alta et basa, jurisdictione, districtu, dominio, imperio mero et misto, ac quibuscumque possessionibus, rebus et juribus, quecumque sint et quocumque nomine censeantur, nichil omnino nobis et nostris heredibus seu successoribus, ducibus Burgondie, in dictis villa et territorio de Gevriaco retinendo. Salva tamen nobis et nostris heredibus seu successoribus antedictis bona garda quam nos habemus et predecessores nostri, duces Burgondie, habuerunt ibidem et salvis nobis et heredibus seu successoribus nostris, predictis ducibus Burgondie, feudis et retrofeudis, si que habemus in villa et territorio de Gevriaco memoratis et juribus feodorum et retrofeodorum ipsorum. Volumus etiam, consentimus et concedimus quod nos aut dicti heredes seu successores nostri quicquam proprietatis, possessionis vel quasi aut juris cujuslibet rei corporalis seu incorporalis quocumque acquisitionis genere vel modo in dictis villa et territorio de Gevriaco non possimus acquirere nec aliquid ibidem nobis aut dictis heredibus seu successoribus nostris possit accrescere, quacumque ratione vel causa, salvis feodis et retrofeodis et eorum juribus, ut superius est expressum. Et si forsan a nobis seu heredibus aut successoribus nostris contrarium fieret, quoquo modo factum illud nullum jus prebeat seu prestet, nec habeat seu habere valeat alicujus roboris firmitatem neque pretextu facti hujusmodi nos aut heredes seu successores nostri aliqua prescriptione longa seu longissima possimus juvari. Pro hiis autem predicti abbas et conventus Cluniacenses ratione concordie, compositionis et ordinationis dictarum, domum suam de Trohaudo, dicte dyocesis Lingonensis, possidendam, tenendam et habendam cum omnibus suis pertinentiis, appendiciis, possessionibus, justitia magna et parva ac fructibus quorumcumque reddituum, proventuum, obventionum et jurium ad dictam domum suam de Trohaudo pertinentium nobis ad vitam nostram dumtaxat, jure presentandi rectores ad ecclesias in quibus dicta domus de Trohaudo jus obtinet patronatus excepto, concedunt et donant. Nosque investientes de eisdem ipsam nobis quoad vixerimus garantire bona fide promittunt ac solvere omnia debita et omnes pensiones in quibus domus ipsa de Trohaudo teneri potest a tempore retroacto usque ad diem confectionis presentium litterarum et in se litis honus suscipere de eisdem, domumque predictam cum suis pertinentiis et nos de illis penitus acquittare, excepta pensione quam debet dicta domus de Trohaudo magistro Johanni de Sancto Sequano ad vitam suam, quam eidem magistro Johanni singulis annis dum vixerit tenemur solvere, quandiu tenebimus dictam domum. Tenemur etiam et promittimus bona fide quod homines dicte domus de Trohaudo ad bonos usus et bonas consuetudines Burgondie ac loci de Trohaudo tenebimus; edificia domus de Trohaudo predicte in statu prospero retinebimus, possessiones debite excoli faciemus. Jura manutenebimus et defendemus nostris propriis sumptibus et expensis. Quicquam de possessionibus et juribus domus ejusdem et pertinentiarum suarum non vendemus, non donabimus, nec permutabimus aut alias non distrahemus seu non alienabimus quoquo modo. In victu et vestitu necessaria ministrabimus uni monacho ibidem Domino famulanti. Procurationes, decimas, vicesimas, subventiones, subsidia et talia consimilia que pro tempore possunt et poterunt ratione domus predicte et pertinentiarum suarum deberi solvemus, dum domus ipsa in manibus nostris erit. Post decessum vero nostrum, dicta domus de Trohaudo, cum pertinentiis, appenditiis, possessionibus, justitia magna et parva et omnibus juribus suis in statu in quo nunc est vel meliori, necnon cum omnibus incrementis, meliorationibus et intra dicte ville de Trohaudo, territorii sui et pertinentiarum suarum metas seu terminos acquisitis, ad dictos abbatem et conventum et ecclesiam suam Cluniacensem sine reclamatione et contradictione cujusquam immunis ab omni onere debitorum libere et pacifice revertetur. De supradictis autem omnibus et singulis a nobis ipsi abbati et conventui et ecclesie sue Cluniacensi, ac dicte domui de Gevriaco datis, concessis, cessis, quittatis et traditis, nos devestientes, de eisdem dictos abbatem et conventum suo, ecclesie Cluniacensis et domus de Gevriaco suarum nomine, investimus. In quorum omnium memoriam, robur et testimonium presentes litteras religiosis predictis tradidimus sigilli nostri munimine roboratas. Datum anno Domini Mo CCo sextuagesimo nono, (sic) mense marcii.
(Au dos:) La garde de Gevrey en Montaygne.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung