Charta qua Martinus de Vergisson et uxor ejus vendiderunt abbati Cluniacensi salceium situm versus molendinum de Rupeforti.
Nos magister Cristinus Bauduini, archipresbiter Viriseti, notum facimus universis presentes litteras inspecturis, quod Martinus de Vergiçon et Guicharda, uxor ejus, in nostra propter hoc presentia constituti, non vi, non dolo, non metu ad hoc inducti, nec ab aliquo circonventi, considerata utilitate sua, ut asserunt, et pro suis negociis communibus utiliter expediendis, vendunt, tradunt, cedunt pariter et
concedunt reverendo in Christo patri Yvoni, miseratione divina abbati Cluniacensi, et conventui ejusdem loci ac eorum successoribus imperpetuum, salceium suum situm versus molendinum de Rupe Forti, desuper pratum Johannis Meschini quondam, inter chiminum ex una parte, et aquam de Graona, ex altera, cum ejus salceii pertinentiis et appendiciis universis, precio octo librarum Viennensium, quas ipsi conjuges venditores confitentur coram nobis se recepisse et habuisse integraliter a predictis religiosis emptoribus in pecunia numerata, se de dicto salceio vendito coram nobis devestiendo et dictos emptores investiendo, et impossessionem corporalem et vacuam inducendo; promittentes dicti conjuges venditores Martinus et Guicharda, uterque in solidum, pro se et suis, per juramenta sua coram nobis corporaliter prestita, supradictum salceium cum ejus pertinentiis et appenditiis venditum sepedictis religiosis emptoribus et suis perpetuo contra omnes deffendere et sub annuo censu duorum solidorum Cluniacensium garantire, et se contra dictam venditionem per se vel per alium non venire, nec contravenire volenti consentire, se et sua bona omnia presentia et futura dictis emptoribus et suis successoribus de evictionis periculo nichilominus obligando. Et cum dictum salceium ad dictam Guichardam pertineret et esset de bonis dotalibus ejusdem, ipsa Guicharda confitetur coram nobis se a predicto Martino, marito suo, habuisse bonam et integram recompensationem ad valorem plenissimam dicti salceii, maxime cum possit sibi plenarie et integre alibi de dote sua consuli et provideri super bonis mariti sui predicti et specialiter cum bona sua dictus Martinus obligaverit, ut asserit, eidem Guicharde pro precio venditionis predicte. Renunciant insuper, etc. In cujus rei testimonium, ad preces et instanciam dictorum conjugum venditorum, sigillum nostrum litteris presentibus duximus apponendum. Datum anno Domini M
o CC
o octogesimo secundo, mense maii.