CCE: cartae cluniacenses electronicae
Database of the Charters of the abbey of Cluny (802-1300)

BB 5298     View  [Back]
Litteræ quibus Wiardus, subcamerarius Cluniacensis et vices gerens pro decano ejusdem loci, notum facit Guidonem, curatum Sancti Mayoli et socios ejus commutavisse quasdam res cum Hugone Guichardi.
Nos frater Wiardus, humilis subcamerarius Cluniacensis et gerens vices decani ejusdem loci, notum facimus universis presentes litteras inspecturis, quod cum dominus Guido, curatus ecclesie Sancti Maioli Cluniacensis, et alii socii in eadem ecclesia deservientes haberent, tenerent et possiderent duos solidos et quatuor denarios Cluniacenses censuales super quadam vinea sita in Bello Monte, quam tenet et possidet magister Hugo Guichardi, clericus, prout ipsi Guido et Hugo asserunt coram nobis, idem dominus Guido in nostra propter hoc presentia constitutus, considerans utilitatem suam et predictorum sociorum et commodum dicte ecclesie Sancti Maioli, de consensu et voluntate dictorum sociorum ejusdem ecclesie, ut asserit, supradictos duos solidos et quatuor denarios Cluniacenses censuales super predicta vinea de Bello Monte sibi, ut dictum est, debitos, donat, tradit vel quasi, quictat, cedit pariter et concedit in escambium predicto magistro Hugoni et suis in perpetuum pro duobus solidis et septem denariis et uno obolo Cluniacensi censualibus, quos dictus Hugo Guichardi habebat, tenebat et possidebat super duobus cultilibus sitis extra portam Sancti Maioli, que cultilia tenet et possidet Garnerius Closers, ut dictus Hugo asserit coram nobis. Quam permutationem utraque pars, dominus Guido pro se et dictis sociis et dictus Hugo pro se et suis coram nobis gratam habuit et acceptam. Promittentes partes predicte pro se et suis per juramenta coram nobis corporaliter prestita supradictum servicium seu censum permutatum alter alteri et suis perpetuo contra omnes deffendere et garantire et se contra dictam permutationem seu escambium per se vel per alium non venire nec contravenire volenti consentire, et quod predictum escambium de cetero non revocabunt nec revocare permittent. Renunciant insuper coram nobis in hoc facto predicti Guido et Hugo ex certa sciencia et per juramentum omni actioni et exceptioni doli mali et in factum et exceptioni escambii legitime non facti, conditioni sine causa vel ex injusta causa, beneficio restitutionis in integrum et omni auxilio et beneficio tocius juris, canonici, consuetudinarii, et civilis per quod dictum escambium possit impediri vel eciam annullari. In cujus rei testimonium, ad preces et requisitionem supradictorum domini Guidonis et magistri Hugonis, sigillum nostrum una cum sigillo dicti Hugonis litteris presentibus duximus apponendum. Et ego predictus Hugo Guichardi, clericus, qui universa et singula, ut dicta sunt superius et expressa, confiteor esse vera, sigillum meum presentibus litteris apposui in testimonium veritatis. Datum anno Domini Mo CCo octogesimo secundo, mense decembris. (Fragment de sceau sur double queue)
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung