Nos magister Cristinus Bauduini, archipresbiter Veriseti, notum facimus universis presentes litteras inspecturis, quod Guido, Yvetus, Johannes, fratres, et Rosa, soror eorumdem, liberi quondam Guillelmi, prepositi de Brei, in nostra propter hoc presentia constituti, non vi, non dolo, non metu ad hoc inducti, nec ab aliquo, ut asserunt, circumventi, sed spontanei, de mandato et voluntate Perrini dou Moler, mariti domine Rose, unanimi consensu vendunt, tradunt vel quasi ac titulo pure et perfecte venditionis perpetuo possidende cedunt pariter et concedunt venerabilibus et religiosis viris fratri Yvoni, miseratione divina abbati Cluniacensi, et conventui ejusdem loci et eorum successoribus in perpetuum, partem suam quam habent vel habere possunt et debent in decima de Brey, scilicet sextam partem medietatis dicte decime fabarum, pisorum, racemorum, milleti, canabi et totius alterius minuti bladi, cum novalibus et primitiis omnium porcorum, vitulorum et in rebus aliis universis, quocunque nomine censeantur, cum tribus quarteronis frumenti in communi decima, et quicquid juris vel actionis habent vel habere possunt et debent in dicta decima de Brey ratione hereditatis paterne vel quacunque alia ratione, precio decem librarum Viennensium, quas dicti liberi venditores confitentur coram nobis se recepisse et habuisse integraliter a predictis religiosis emptoribus in pecunia numerata; se de dictis rebus et juribus venditis coram nobis devestiendo et dictos emptores investiendo vel quasi, de eisdem [ipsos] in possessionem corporalem et vacuam inducendo. Item predicti liberi venditores quittant predictos religiosos emptores de fructibus et exitibus partis sue decime, quos receperunt vel alter pro ipsis ratione cujusdam saisine vel quacunque alia ratione a retroactis temporibus usque nunc, penitus et absolvunt. Promittentes dicti liberi venditores et Perrinus dou Moler per juramenta sua, etc. Et si quid dicte res vendite et quittate valebant seu valent aut valiture sunt in futurum ultra precium supradictum, totum illud quod plus valent vel valere possent in posterum donant dicti venditores predictis emptoribus et suis in perpetuum donatione facta irrevocabili inter vivos, cedunt, concedunt, tradunt vel quasi, guerpiunt pariter et remittunt; asserentes per juramentum dicti venditores quod aliquid non fecerunt vel facient aut fieri permittent, quominus dicta venditio firma sit et stabilis in perpetuum et in sua permaneat firmitate. Renunciantes in hoc facto omnes et singuli superius nominati ex certa scientia sub virtute prestiti juramenti, etc. ... In cujus rei testimonium, ad preces et instantiam supradictorum liberorum venditorum necnon et predicti Perrini, mariti dicte Rose, sigillum nostrum litteris presentibus duximus apponendum. Datum anno Domini M^o CC^o octogesimo tercio, mense novembris.