Universis presentes litteras inspecturis, frater Geraldus Bos, decanus, et Golferius Boisso, monachus monasterii Mauziacensis, Cluniacensis ordinis, Claromontensis diocesis, a viris venerabilibus et religiosis Guillelmo priore et conventu dicti monasterii Mauziacensis procuratores constituti ad petendam a reverendo in Christo patre donno Yvone, Dei gratia abbate Cluniacensi, patre abbate nostro, confirmationem electionis de viro venerabili et religioso Haymone Bruni, priore tunc Rubiaci, nunc electo dicti monasterii Mauziacensis, nosque fratres Guillelmus de Sancto Saturnino, prior de Droituras, et Johannes de Cortoys, sacrista prefati monasterii, salutem in Domino. Noveritis quod persona predicti electi et decreto pretacte electionis a nobis, prenominatis procuratoribus, dicto patri abbati nostro Cluniacensi, prout moris est, presentatis, idem pater abbas de verbis in eligendo electum predictum a nobis priore de Droituras supradicto, cui a prefatis priore et conventu Mauziacensi fuit eligendi abbatem in ipso monasterio et providendi de pastore eidem data potestas, prolatis, volens habere certitudinem pleniorem dum electionis examinaret predicte processum et formam, requisivit a nobis juratis in presentia sancti euvangelii, ut de predictis verbis in eligendo prolatis nos procuratores, prior de Droituras, et sacrista prenominati deponeremus plenissimam veritatem; qui secreto et sigillatim super hoc deponentes deposuimus in hunc modum. Primo ego prior de Droituras, cui ab omnibus et singulis de conventu monasterii Mauziacensis, die ad eligendum statuta, in capitulo presentibus data fuit eligendi potestas, sic electionis verba protuli: Ego frater Guillelmus de Sancto Saturnino, prior de Droituras, vice mea et omnium de conventu, auctoritate potestatis mihi tradite et concesse, virum venerabilem et religiosum in spiritualibus et temporalibus circonspectum, morum honestate preclarum, fratrem Haymonem Bruni, priorem Rubiaci, nomino et eligo in abbatem hujus monasterii Mauziacensis et pastorem, et eidem monasterio provideo de eodem. Ego vero frater Geraldus Bos, decanus predictus juratus et a patre nostro abbate Cluniacensi predicto requisitus super predictis verbis a dicto priore de Droituras in eligendo prolatis dicere veritatem, deposui et dixi dictum priorem de Droituras hec verba pronuntiasse: Ego frater Guillelmus de Sancto Saturnino, prior de Droituras vice mea, etc. (Ut supra) Ego Golferius Boisso, monachus predicti monasterii juratus et requisitus a dicto patre nostro abbate Cluniacensi super predictis verbis dicere veritatem, dixi et deposui dictum priorem de Droituras protulisse verba electionis hoc modo: Ego frater Guillelmus, etc. (Ut supra) Ego etiam Johannes de Cortoys, sacrista monasterii predicti juratus et super predictis verbis requisitus a predicto patre nostro abbate Cluniacensi dicere veritatem, deposui et dixi dictum priorem de Droituras electionis hujusmodi verba in hunc modum pronuntiasse: Ego Guillelmus, etc. (Ut supra) In quorum premissorum testimonium sigilla nostra duximus presentibus litteris apponenda. Datum Cluniaci, die martis post dominicam qua cantatur Letare Jherusalem, anno Domini millesimo CC^o LXXX^o quarto.