Privilegium Honorii papæ IV, quo vidimat epistolam Innocentii papæ II, ad prælatos, de indulgentiis a se concessis omnibus qui ecclesiam Cluniacensem in anniversario die ipsius dedicationis visitaverint.
Honorius, episcopus, servus servorum Dei, universis Christi fidelibus presentes litteras inspecturis, salutem et apostolicam benedictionem. Quasdam litteras, quas felicis recordationis Innocentius papa secundus, predecessor noster, in favorem dilectorum filiorum ... abbatis et conventus monasterii Cluniacensis, venerabilibus fratribus archiepiscopis et episcopis, ad quos littere ipsius predecessoris pervenirent, dicitur direxisse, nobis iidem abbas et conventus presentarunt. Verum quia hujusmodi littere incipiunt nimia vetustate consumi, nos ipsorum abbatis et conventus supplicationibus annuentes, dictas litteras de verbo ad verbum presentibus fecimus annotari, quarum tenor talis est: Innocentius, etc. Datum Valentie, VIII idus martii. Per hoc autem vobis et monasterio vestro nullum jus de novo acquiri volumus, sed vobis et sibi antiquum, si quod est, tantummodo conservari. Datum Rome, apud Sanctam Sabinam, V idus maii, pontificatus nostri anno primo.