Nos frater Johannes de Susterris, humilis prior prioratus de Grasac, ordinis Cluniacensis, Aniciensis diocesis, notum facimus universis quod cum Humbertus Boni Hominis moveret nobis questionem super bajulia prioratus nostri de Grasac, quam siquidem bajuliam dicebat dictus Humbertus quondam fuisse concessam per Paganum, priorem quondam de Grazac, socero suo Poncio Palayni ac suis heredibus et successoribus universis; nos vero frater Johannes et Humbertus predictus compromisimus in religiosum virum priorem de Roseriis et domnum Paulum, rectorem ecclesie de Boysset, tanquam in arbitros arbitratores seu amicabiles compositores. Qui quidem arbitri arbitratores, inquisita veritate super dicta questione ac jure quod dictus Humbertus dicebat se habere in balivia predicta, ratione accessionis et donacionis quondam facte Poncio Palayni predicto, arbitrati fuerunt et difiniverunt Humberto predicto et heredibus suis dictam bajuliam suam fore reddendam et insuper nobis Johanni, predicto priori, sub pena in compromisso apposita, injunxerunt ac etiam preceperunt arbitratores predicti ut dictam bajuliam dicto Humberto redderemus. Nos vero Johannes, prior, cercioratus de jure dicti Humberti, et oc dicto seu arbitrio predictorum arbitrorum approbato, tibi dicto Humberto presenti et recipienti pro te et tuis dictam bajuliam nostram de Grasac, reddimus et tradimus vel quasi, investientes te dictum Hymbertum et per te heredes et successores tuos de dicta bajulia, cum juribus suis, pertinenciis universis, qualiacumque sint et esse possint, ita quod in villa de Grasac et extra, ubicumque domus seu prioratus de Grasac homines sive terram habeas et percipias ibi tuam bajuliam, prout olim alii bajuli habuerunt et perceperunt, promittentes, etc. Actum in castro de Monestrol, in orto Petri Boni Hominis, anno Domini M^o CC^o LXXX^o VIII^o, die mercurii post festum beati Burenou, presentibus testibus dictis arbitris, domno Andrea Pistoris, domino Antonio de Valle, presbiteris; Johanne Borelli, Johanne Fabri et pluribus aliis. In cujus rei testimonium et firmitatem perpetuam premissorum, nos dictus prior huic carte, de voluntate nostra confecte, sigillum nostrum duximus apponendum. (Le sceau est perdu)