CCE: cartae cluniacenses electronicae
Database of the Charters of the abbey of Cluny (802-1300)

BB 5371     View  [Back]
Testamentum Dannonæ, relictæ Haymonis de Fluyreyo.
In nomine sancte et individue Trinitatis, Patris et Filii et Spiritus sancti. Amen. Cum propter delictum primi parentis generis humani successio quelibet sit transsitoria et mortalis et quilibet sit certus de morte, de hora tamen mortis incertus, ob eandem causam, ego Dannona, relicta domini Haymonis de Fluyreyo, militis defuncti, nolens decedere intestata, testamentum meum in bona et sana memoria, sana mente et corpore per Dei gratiam existens, facio meam ultimam voluntatem solam et unicam, omni alia revocata, si aliquam feci, ordino et de rebus et bonis meis dispono in hunc modum. In primis sepulturam meam eligo in cimiterio ecclesie Beati Marcelli de Fluyreyo. Preterea debita mea legittime probata in presentia executorum meorum quos hic inferius nominabo et legata mea hic inferius scripta solvi, clamores meos, si qui sint, pacificari et emendari volo et precipio per manus dictorum executorum meorum, antequam heredes mei ad divisionem bonorum meorum accedant vel gaudeant de eisdem. Item do et lego curato meo decem solidos Viennensium, vicariis suis pro pitantia decem solidos Viennensium. Item do et lego aliis presbiteris et clericis Deo servientibus in ecclesia Beati Marcelli predicti viginti solidos. Item do et lego Deo et ecclesie Beati Marcelli predicti pro anniversario meo in eadem annuatim faciendo decem solidos Viennensium reddituales, quos assideo dicte ecclesie super unam petiam terre sitam en Barges juxta terram dominorum de Fluireyo et viam per quam itur apud Morqueil; conventui Sancti Marcelli Cabilonensis centum solidos Viennensium pro pitantia; conventui Sancti Sequani quadraginta solidos Viennensium; domino Guidoni, decano Sancti Sequani, viginti solidos Viennensium. Item do et lego fratribus Vallis Beate Marie viginti solidos Viennensium; fratribus predicatoribus de Dyvione viginti solidos Viennensium; fratribus minoribus ejusdem loci viginti solidos Viennensium; quinque hospitalibus Dyvionensibus cuilibet quinque solidos; hospitali de Braschons decem solidos; conventui de Praalons decem solidos; hospitali Pontis Norgiarum decem solidos; conventui Sancti Benigni Dyvionensis viginti solidos. Item do et lego Deo et ecclesie Sancti Johannis de Fluyreyo decem solidos Viennensium pro anniversario meo bis in anno in eadem ecclesia faciendo pro remedio anime mee et antecessorum meorum, quos assideo dicte ecclesie super unam petiam terre sitam in finagio de Fluyreyo, en Barges, inter terram dominorum de Fluyreyo hinc et inde. Item do et lego Henrico de Fluyreyo clerico pro beneficiis, servitiis et curialitatibus michi et fratri Hugoni, monacho ac elemosinario Cluniacensi, fratri meo, impensis et que michi et dicto fratri meo fuerunt quam plurimum fructuosa, unum tropellum ovium que sunt in domo Girardi Cortoys. Item do et lego Dannone de Colongiis unam eminam ordey; Dannone, filie Artaudi, unam eminam ordey; Dannone, filie Martini de Ruepot, unam eminam ordey; Ysabelli de Ycio viginti solidos Viennensium. Item do et lego cuilibet ecclesie decanatus Sancti Sequani tresdecim denarios pro absolutione anime mee et antecessorum meorum in dictis ecclesiis anno revoluto post mortem meam facienda; Meline de Colongiis unam eminam bladi; domino Haymoni presbitero decem solidos Viennensium; domino Jacobo presbitero decem solidos; domino Hugoni de Plomberiis decem solidos; domino Guillelmo presbitero decem solidos; domino Ogerio de Stanno decem solidos; ecclesie Sancti Johannis de Fluyreyo sexaginta solidos distribuendos et ponendos in utilitatem et usus dicte ecclesie per manum Henrici clerici, prout saluti anime mee melius viderit expedire. Item do et lego hospitali de Fluyreyo unum lectum munitum culcitra, pulvinari, linteaminibus et supellectili; leprosarie de Fluyreyo decem solidos; Perronete, filie Henrici de Valle Susionis, centum solidos Viennensium. Item do et lego Marionete pedissece mee viginti solidos; duobus boveriis meis, videlicet Perroneto et dicto Besançon, cuilibet do et lego decem solidos Viennensium. Item do et lego ecclesie Vergeii pro anniversario meo in eadem ecclesia bis in anno faciendo pro remedio anime mee et antecessorum meorum viginti solidos Viennensium. Item do et lego fratri Jacobo et fratri Petro de Belna, monachis Cluniacensibus, centum solidos Viennensium semel pro uno breviario emendo; fratri Petro de Gilleyo monacho quadraginta solidos Viennensium. Item do et lego pro remedio anime mee et antecessorum meorum conventui Cluniacensi omnia bona mea mobilia et immobilia que poterunt inveniri post decessum meum, legatis meis predictis primo de eisdem bonis meis solutis et clamoribus meis, si qui sint, pacificatis. Et hoc tamen salvo quod predictus elemosinarius frater meus ad vitam suam de predictis bonis, que de residuo fuerint, gaudeat pro omni sua voluntate facienda, quamdiu vixerit, et post ipsius decessum, ad predictum conventum perpetuo et sine contradictione aliqua dictum residuum revertatur. Hujus autem mei testamenti et dispositionis ac ordinationis rerum et bonorum meorum executores meos instituo et facio dilectos meos, videlicet virum religiosum fratrem Hugonem, monachum ac elemosinarium Cluniacensem, karum fratrem meum, dominum Guidonem de Castronovo, sacristam Vergeii, et fratrem Petrum de Anberta, monachum Cluniacensem, in quorum manibus pono et delibero omnia bona mea mobilia et immobilia, presentia et futura quecumque sint. Et in ipsos et quemlibet ipsorum transfero omnes actiones et omnia jura michi competentia et volo quod possint facere omnia quecumque ego facerem vel facere possem si viverem, pro predictis omnibus et singulis exequendis. Et si forte dicti executores simul ad predicta exequenda interesse noluerint vel non potuerint, tamen volo quod unus ipsorum nichilomimus vel duo predicta exequantur. Item et volo quod dicti executores mei super predictis non teneantur alicui reddere rationem, sed credatur simplici verbo ipsorum aut unius eorumdem. Si vero in hac presenti scriptura aliquid dubium fuerit, volo, precipio quod interpretationi et voluntati dictorum executorum meorum vel unius ipsorum aut duorum stetur penitus et precise. Et si forte aliquis contra predicta vel aliquid predictorum venire presumpserit, volo quod dono et legato et ab omni successione mea penitus sit privatus. Hec autem omnia supradicta ego dicta Dannona, soror dicti fratris Hugonis, volo valere jure testamenti in scriptis vel jure codicillorum seu jure testamenti nuncupativi seu jure donationis inter vivos aut jure ultime voluntatis aut alio jure quo melius valere poterit et debebit. In quorum omnium predictorum testimonium huic presenti scripto seu testamento sigillum curie domini ducis Burgundie supplicavi apponi in testimonium veritatis, cujus jurisdictioni quoad hoc suppono heredes ac exequtores meos et ad majorem firmitatem omnium predictorum, sigillum predicti fratris mei, sigillum curie de Fluireio, sigillum prioris Vallis Beate Marie, sigillum Guidonis, decani Sancti Sequani, et sigillum ecclesie de Fluireio, una cum sigillo predicte curie dicti ducis, presentibus rogavi apponi in testimonium predictorum. Actum in presentia Hugonis de Caliaco, notarii Dyvionensis, Guillelmi Nerjot, Nicholai le Ruer, Perroneti Champaigne, Perronini Escarllot et Johannis de Lugduno clerici, testium ad hec vocatorum, anno Domini Mo CCo octogesimo nono, mense januario.
[Back]

E-Mail an das Projekt "Cluny" im Institut für Frühmittelalterforschung

 

KONTAKT


Institut für Frühmittelalterforschung
Domplatz 20-22
48143 Münster
Tel: +49 251 83 27921
Email: fruehmittelalter@uni-muenster.de

Impressum   Datenschutzhinweis

© 2010 Institut für Frühmittelalterforschung