Noverint universi quod reverendi in Christo patres, videlicet domnus Hugo, Dei gratia episcopus Tholosanus, ex una parte, et domnus Guillelmus, eadem gratia Cluniacensis abbas, ex altera, super questione seu debato quod erat vel esse sperabatur inter partes predictas ratione et occasione subjectionis monasterii Lezatensis, prioratuum et membrorum ejusdem et omnium pertinentiarum eorumdem, unanimiter et concordatim compromiserunt in venerabiles viros domnos magistros Egidium Camelini, Laudunensem canonicum, et Johannem de Feritate, clericos, et Petrum Flote, militem domini regis, tenentes pro eodem domino rege parlamentum Tholose, et domnum Eustachium de Bello Marchesio, militem, senescallum Tholosanum et Albiensem, tanquam in arbitros arbitratores, amicabiles compositores, dispensatores, ordinatores et bonos viros, dantes et concedentes partes predicte dictis arbitris arbitratoribus, amicabilibus compositoribus, dispensatoribus, ordinatoribus et bonis viris plenam et liberam potestatem dicendi, pronuntiandi, laudum et arbitrum proferendi, etc., hinc ad mediam kadragesimam proximo subsequentem; promittentes partes, etc., sub pena mille marcharum argenti a parte parti stipulata sollempniter et promissa, que tociens in singulis capitulis comittatur quotiens fuerit contrafactum, etc., et ideo quia fuit visum expediens ipsis domnis ad tuitionem et meliorem eventum negocii supradicti quod duo ex ipsis qui melius et com[m]odius possent potestatem habere, etc., dominos magistros Egidium Camelini et Johannem de Feritate, domini regis clericos, constituerunt et etiam elegerunt; ad hec vero religiosi viri fratres Richardus de Prissigneio et Petrus de Bello Joco, monachi Cluniacenses, procuratores seu sindici dicti domini abbatis et conventus monasterii Cluniacensis, prout ex tenore procurationis inferius inserte, sigillate sigillis dictorum abbatis et conventus, manifeste apparet, consenserunt, etc. Tenor vero dicte procurationis sequitur in hec verba: Universis presentes litteras inspecturis, frater Guillelmus, miseratione divina Cluniacensis ecclesie minister humilis, et conventus ejusdem loci, salutem in Domino. Noveritis, quod cum inter reverendum in Christo patrem, domnum Dei gratia episcopum Tholosanum, et capitulum Tholosanum, suo et ecclesie Tholosane nomine, ex una parte, et nos, nostro et ecclesie Cluniacensis predicte nomine, ex altera, super subjectione monasterii Lesatensis et omnium membrorum et pertinentiarum sibi subjectarum, causa seu controversia verteretur, nos karissimos fratres nostros, Richardum de Prissigneio et Petrum de Bello Joco, monachos, exhibitores presentium et eorum quemlibet in solidum, ita quod melior non sit conditio occupantis, procuratores nostros facimus, etc. Obligantes nos sub ypotheca rerum ecclesie nostre Cluniacensis predicte dicto domno episcopo et capitulo Tholosanis, et venerabilibus viris, magistris Egidio Camelini, canonico Laudunensi, Johanni de Firmitate, illustris domini regis Francorum clerico, domno Petro Flote, et domno Eustachio de Bello Marchesio, senescallo Tholosano, militibus, parlamentum Tholose pro dicto domino rege tenentibus, in quos per nos solum abbatem Cluniacensem super dicta causa seu controversia cum dicto domno episcopo Tholosano compromissum extitit et omnibus quorum interest vel interesse potest, licet absentibus, per hanc presentem cartam, nos gratum et ratum habituros quicquid per dictos procuratores nostros vel alterum ipsorum substitutum vel substitutos ab eis, etc. Et hoc omnibus, quorum interest vel interesse potest, significamus per hanc dictam cartam sigillorum nostrorum munimine roboratam. Actum anno Domini M^o CC^o nonagesimo, mense marcii.

Item et ad hec omnia et singula supradicta consenserunt ratificando et approbando ea, videlicet venerabiles viri, domnus Arnaldus Rotgerii, prepositus ecclesie Tholosane, donnus Arnaldus Mascaronis, domnus Ysarnus de Sancto Paulo, cancellarius Tholose, Bernardus de Sayshes, Gausserandus de Bello Podio, Bernardus de Astarag, Guillelmus Arnaldi de Maurenco, Petrus de Spaone et Yspanus de Maurenco, canonici ecclesie Tholosane, in presentia dictorum dominorum personaliter constituti, consenseruntque, ut dicitur, ceteri de capitulo ecclesie Tholosane, prout in instrumento, ut dicitur, inde ipsa eadem die scripto manu Bardini Rosbatensis, publici Tholose notarii, continetur. Factum fuit hujusmodi compromissum die veneris post Cineres, regnante Philippo rege Francorum et Hugone episcopo supradicto, anno ab incarnatione Domini M^o CC^o nonagesimo, in presentia et testimonio magistri Michaelis de Lupperiis, Ramondi de Guaderiis, Bardini, magistrorum Aicardi de Vauro, judicis dicti domini senescalli Tholosani, et Bartholomei de Garda, Petri Maurini, magistri Bernardi Sancii,

magistri Rainaldi de Dunerhaco, magistri Arnaldi, magistri Bertrandi d'Esparros et Petri de Pradinis.

Item predicte constitutionis et electionis dictorum domnorum facte die jovis ante festum Pasche Domini, sub anno incarnationis Dominice M^o CC^o nonagesimo primo, sunt testes: magistri Arnaldus Clari, Caturcensis et Petragoricensis, Laurentius de Trecis, Caturcensis judices; magister Bardinus, curie vicarii Tholose notarius.

Item et consensus, ratificationis et approbationis dictorum procuratorum abbatis et conventus monasterii Cluniacensis, atque etiam prepositi et canonicorum predictorum ecclesie Tholosane, quod fuit factum sabbato in vigilia dicti festi Pasche Domini, sunt testes dicti magistri Arnaldus Clari, Petragoricensis et Caturcensis, et Laurentius de Trecis, Caturcensis judices, Ramundus de Gauderiis et Bardinus, predicti, et Guillelmus de Gauderiis, publicus Tholose notarius, est de toto testis, et fuit ad omnia presens, qui cartam ipsam scripsit.

Ad hec vero nos predicti, tenentes parlamentum Tholose, in fidem et testimonium premissorum, et ad majorem omnium firmitatem, sigilla nostra apponi fecimus huic publico instrumento. Nosque Eustachius de Bello Marchessio, miles, senescallus Tholosanus et Albiensis, predictis omnibus et singulis consentientes expresse, sigillum nostrum, una cum sigillis domnorum tenentium parlamentum Tholose, apponi fecimus huic publico instrumento.