Nos Stephanus de Sancto Pontio, clericus, tenentes (sic) sigillum commune domini regis Francorum in baillivia Matisconensi, notum facimus presentes litteras inspecturis, quod cum discordia verteretur seu questio inter Odetum de Neblans, prepositum Sancti Andree, ex una parte, et Bernardum, Perretum Gaitot, fratres (Perretus Gaitot pro se et ejus fratribus et sorore), Theobaldum Gregorii, Girardam, uxorem ejus, Morellum des Angles, Perretum des Angles, Jacobum et Stephanetam, eorum sororem, de Chivigniaco, ex altera, super eo quod dictus Odetus dicebat et proponebat contra dictos homines, quod ipsi erant sui homines taillabiles et explectabiles ratione mansorum suorum, quos tenebant ab ipso Odeto in parrochiatu et territorio de Chivigniaco, quare petebat prefatus Odetus dictos homines sibi adjudicari taillabiles et explectabiles ratione mansorum predictorum, dictis hominibus in contrarium proponentibus et dicentibus, quod super petitionem predictam dictus Odetus non debebat aliquatenus exaudiri, ex eo quod dicti homines non confitebantur se esse homines taillabiles nec explectabiles dicti Odeti; tandem, post multas extricationes inter predictos habitas super dicta discordia seu questione, bonis viris mediantibus, videlicet domino Johanne Boillet de Sancto Andrea, presbitero, curato Beate Catharine de Albergamento, predicto Odeto et predictis hominibus, domino Humberto de Manzeat, curato de Chivigniaco, extat pacificatum et etiam concordatum in hunc modum: videlicet quod dicti Bernardus, Perretus Gaitot et eorum fratres et sorores et eorum heredes ... possideant in perpetuum mansum suum cum appendiciis dicti mansi pro viginti solidis Cluniacensibus et duobus bichetis avene ad mensuram de Dondano, et pro quolibet igne existente in dicto manso unam gallinam, censualibus solvendis annuatim dicto Odeto et suis in perpetuum ad festum beati Martini hyemalis. Item dicti Perretus Gaitot et Theobaldus Gregorii pro uxore sua predicta et eorum heredes teneant et possideant mansum suum cum appendiciis dicti mansi pro viginti solidis Cluniacensibus, duobus bichetis avene et pro quolibet igne existente in dicto manso unam gallinam, censualibus solvendis annuatim dicto Odeto et suis in perpetuum ad terminum supradictum, et quod Morellus des Angles teneat et possideat mansum suum cum appendiciis dicti mansi et sui in perpetuum pro quinque solidis Cluniacensibus, cum una gallina, censualibus solvendis dicto Odeto et suis in perpetuum ad terminum supradictum. Item quod Petitus des Angles, Morellus predictus, Jacobus des Angles et eorum fratres et sorores teneant et possideant mansum suum cum appenditiis dicti mansi et sui in perpetuum pro duodecim solidis Cluniacensibus, cum duobus gallinis censualibus solvendis dicto Odeto et suis in perpetuum ad festum predictum: pro quibus serviciis seu censibus dictus Odetus pro se et suis quittat et absolvit dictos homines et suos heredes omnes, successoresque in perpetuum ab omni servitute, taillia, corveya, complenta, angaria et perangaria et ab omnibus aliis generibus servitutis, etc. ..., volens dictus Odetus pro se et suis in perpetuum quod dicti homines sui teneant et possideant mansos suos cum appendiciis dictorum mansorum tanquam libere persone immunes, liberos et absolutos ab omni genere servitutis, salvis sibi et suis annuis censibus supradictis, hoc tamen salvo et retento dicto Odeto et suis, quod predicti homines et sui et heredes eorum non possunt nec debent in predictis mansis ... alium dominum reclamare nec advocare quam dictum Odetum et suos in perpetuum. Excepit autem dictus Odetus ab actatione et absolutione predicta, quod in eis sibi et suis retinuit quatuor casus: videlicet si maritaret filiam suam, vel si efficeretur novus miles, seu transactayret ultra mare, seu acquireret terram contiguam seu vicinam mansorum predictorum seu heredes ipsius: quod illo anno quo videlicet de illis casibus dicto Odeto vel suis contingeret, quod census predictus debet duplicari dicto Odeto et suis a dictis hominibus vel suis racione mansorum predictorum, prout dicti Odetus et homines coram mandato nostro, videlicet Clemente de Sancto Andrea, clerico jurato nostro ad hoc a nobis specialiter deputato, omnia supradicta universa et singula, ut dicta sunt superius et expressa, confitentur et asserunt esse vera. Hanc autem pacem et concordiam partes predicte pro se et suis coram dicto jurato ratam et gratam habuerunt, etc. Renunciantes, etc. In cujus rei testimonium, ad preces dictarum partium nobis per dictum mandatum nostrum oblatas, cui super hiis et aliis fidem plenariam adhibemus, cum nobis constet de premissis per relationem dicti jurati nostri, sigillum predictum presentibus litteris duximus apponendum. Datum anno Domini M^o CC^o nonagesimo primo, salvo jure domini regis et etiam alieno, die mercurii ante festum beate Marie Magdalene. Expedita est coram me Clemente de Sancto Andrea, clerico, sub hoc signo meo.