Nos Stephanus de Sancto Poncio, clericus, tenens sigillum commune domini regis Francie in ballivia Matisconensi constitutum, notum facimus universis presentes litteras inspecturis, quod coram mandato nostro, videlicet magistro Garino de Sancto Jangulpho, jurato domini regis et nostro ad hoc a nobis specialiter deputato, Reynaldus dictus Piguillaz de Montelie et Amica, ejus uxor, ipsi conjuges et quilibet ipsorum ex certa scientia sua, non vi, non dolo, non metu ad hoc inducti, sed eorum pura et mera et spontanea voluntate, pura et mera et irrevocabili donatione ad presens inter vivos, pro remedio animarum suarum et parentum ipsorum, donaverunt, dederunt et concesserunt ac eciam tradiderunt omnia bona ipsorum, mobilia et immobilia, que nunc habent et in futurum habebunt usque in extremum diem vite sue, reverendo in Christo patri domino Guillelmo, divina permissione abbati monasterii Cluniacensis, ibidem presenti et presentem donationem recipienti, nomine et vice predicti monasterii sui. Fecerunt, inquam, jam dicti conjuges et quilibet ipsorum jam dicto domino abbati recipienti, nomine predicti monasterii sui, de predictis omnibus bonis eorum presentibus et futuris donationem predictam, sive ipsa bona consistant nunc vel in futurum in bonis mobilibus vel immobilibus vel nominibus debitorum, terris cultis vel incultis, domibus, casalibus, pratis, vineis, nemoribus, gasturis, pedagiis, venationibus, stangnis, piscationibus, tractibus ferarum, taliis, ademplis justis, complanctis, dominiis, dominicaturis, mero et misto imperio et juriditione vel rebus aliis seu juribus quibuscumque, que dici vel excogitari possint et quocumque nomine appellari. Facientes predicti conjuges, coram dicto mandato nostro, jam dicto domino abbati donationem predictam, eo modo ut ipse dominus abbas ejusque successores in monasterio predicto, nomine predicti monasterii, predicta omnia donata cum omnibus juribus et pertinenciis spectantibus et pertinentibus ad ipsas res donatas integro statu habeant, teneant, et possideant et quasi possideant, et de hiis quicquid voluerint faciant ad eorum omnimodam voluntatem sine contradictione dictorum conjugum et cujuslibet ipsorum in posterum apponenda, et cum dictorum conjugum et cujuslibet ipsorum deffensione in juditio et extra; contra quamcumque personam constituentes ipsi conjuges et quilibet ipsorum ex certa scientia sua se tenere et possidere et quasi predicta omnia et singula donata pro predicto domino abbate, donec dictus dominus abbas per se seu fratrem Egidium, decanum de Julleyo, seu per aliam quamcumque personam ecclesiasticam vel secularem dictarum rerum donatarum possessionem apprehenderit corporalem, quam apprehendendi et retinendi sua propria auctoritate dicto domino abbati omnimodam dederunt licenciam et concesserunt. Mandantes et cedentes conjuges predicti et quilibet ipsorum, ex causa donationis predicte, predicto domino abbati omnia jura, omnesque actiones reales et personales, mistas et rei persecutorias eis competentes et competituras pro predictis rebus et juribus donatis contra quamcumque personam, collegium et universitatem. Constituentes dicti conjuges abinde in antea, coram dicto mandato nostro, predictum dominum abbatem in predictis rebus et juribus donatis procuratorem ut in rem suam propriam. Promittentes dicti conjuges et quilibet ipsorum, coram dicto mandato nostro, predicto domino abbati sollempniter stipulanti nomine predicti monasterii sui, donationem presentem et omnia que continentur in ea omni tempore gratam, ratam et firmam habere et tenere et nullo tempore contravenire de jure vel de facto, nec venire volenti consentire. Renunciantes siquidem dicti conjuges et quilibet ipsorum coram dicto mandato nostro et per pactum expressum ex certa scientia sua super premissis et quolibet premissorum exceptioni doli, metus et in factum, etc. ... Quibus omnibus sic peractis, presentis donationis tenore ex integro reservato, Lambelino filio dictorum conjugum presenti, ipse Lambelinus ex certa scientia donationem predictam et omnia que in ea continentur coram dicto mandato nostro ratificavit, approbavit et emologavit, faciendo ipse Lambelinus de omnibus juribus sibi competentibus et competituris in predictis rebus et juribus donatis predicto domino abbati recipienti, nomine jam dicti monasterii sui, integro statu consimilem donationem et cessionem, renunciationes et obligationes tali modo, quod omni tempore et coram quacumque curia, sicut parentes ipsi predicti donationem predictam fecerunt jam dicto domino abbati, ita et ipse Lambelinus de juribus sibi competentibus in predictis rebus donatis per dictos parentes ejus, donationem perfectam dicto domino abbati fecisse intelligatur. Firmando ipse Lambelinus presentem confirmacionem suam et donationem proprio sacramento prestito coram dicto mandato nostro super euvangeliis sacrosanctis. Supponentes se predicti conjuges et quilibet ipsorum et Lambelinus eorum filius coram dicto mandato nostro, quoad hec heredesque suos, omnia bona sua juridictioni et potestati domini regis sine advocatione alterius curie sive fori; ita quod nos vel ille qui dictum sigillum tenebit aut ballivus Matisconensis, qui pro tempore fuerit ballivus, possimus ipsos aut suos compellere et constringere per captionem et districtionem omnium bonorum suorum ubicumque se transferant seu faciant mansionem, ad tenendum et observandum tenorem presentium litterarum. In cujus rei testimonium, ad preces et requisitionem dictorum conjugum et cujuslibet ipsorum et dicti Lambelini eorumdem filii nobis per predictum mandatum nostrum oblatas, cui super hiis et aliis fidem plenariam adhibemus, sigillum predictum presentibus litteris duximus apponendum, salvo jure domini regis ac eciam alieno. Datum anno Domini millesimo CC^o nonagesimo primo, mense agusti. (Le sceau manque)