Universis presentes litteras inspecturis, Petrus, miseratione divina Aurelianensis episcopus, salutem in Domino. Notum facimus quod cum frater Robertus de Challi, monachus, prior Sancte Marie de Porta Sancti Leonis Senonensis, pro quibusdam enormibus excessibus super quibus dicebatur multipliciter diffamatus, de mandato venerabilis patris ... abbatis Cluniacensis, captus fuisset et in carcere detentus tanquam dicto abbati inobediens, ut dicitur, et rebellis; tandem dicto fratre Roberto ad cor contrictum et humiliatum per Dei graciam revertente [et] misericordiam non judicium requirente, bonis viris et amicis communibus interponentibus partes suas, ad expeditionem et liberationem dicti fratris Roberti, placuit ... abbati predicto nobis committere totum honus expeditionis predicte, providere videlicet, statuere et ordinare, de consilio religiosi viri fratris Symonis, prioris Caritatensis, formam et modum per quem dictus frater Robertus ad honorem Dei, totius Cluniacensis ordinis et anime sue salutem posset a carcere liberari. Et nos qui ordinem Cluniacensem et personas ordinis in caritate non ficta diligimus, onus predictum pro bono et pace dicti ordinis amplectantes, deliberatione super hoc habita diligenti cum discretis et religiosis viris, et specialiter cum priore Caritatensi predicto, de consilio ejusdem et assensu, statuimus et ordinamus ea que sequuntur: In primis idem frater Robertus a suo ... abbate et ab aliis excommunatoribus humiliter petet absolvi ab omnibus sententiis prolatis in ipsum ab eisdem quibus dicitur esse ligatus; ab illis vero quas propter conjurationes seu conspirationes, si quas contra abbatem suum predictum fecit, dicitur incurrisse, petet absolvi ad cautelam. Item predictus frater Robertus in pleno capitulo Cluniacensi recognoscet expresse se malo usum consilio et contra ordinis Cluniacensis privilegia procurasse, in ... abbatem Cluniacensem et in ... abbatem Sancti Rigaudi, ... priores de Marcignaco et de Boniaco sententias excommunicationum tales quales promulgari per priorem monasterii Celle, et quod per se et amicos suos sententias hujusmodi, quatenus de facto processerunt, revocari procurabit. In aliis vero recognoscet culpam suam in generali, non exprimendo certum crimen, et confitebitur deliquisse et fuisse et esse culpabilem, et humilime veniam petet, et supponet se humiliter et devote in omnibus et per omnia beneplacito dicti abbatis, et promittet bona fide et in verbo sacerdotis, in presentia totius conventus, quod de cetero, publice vel occulte, pro preteritis et presentibus casibus et articulis non se opponet dicto ... abbati vel alicui superiorum suorum in ordine, appellando vel alias quomo[do]libet in forma judicii vel extra judicium procedendo, et quod in futurum non conspirabit contra aliquem superiorum suorum, nec alias machinationem aut aliquid aliud inconveniens contra aliquem de ordine faciet aut fieri procurabit; volentes et ordinantes quod omnes injurias et rancores, si quos vel quas habet contra aliquos de ordine monachos vel priores, necnon contra quoscumque alios ratione captionis ejusdem, quittet et remittet omnino. Volumus etiam quod specialiter idem Robertus renunciet appellationibus quibuscumque contra quoscumque interpositis hacthenus ab eodem. Item quia interdum ad correctionem persone multum prodest loci mutatio, idem frater Robertus pure et simpliciter in capitulo Cluniacensi renuntiabit juri sibi competenti in prioratu Beate Marie de Porta Sancti Leonis Senonensis predicto, et jurabit imperpetuum non repetere prioratum predictum, nec aliquid de juribus ad eundem prioratum spectantibus, nec impetrare relaxationem hujusmodi juramenti, nec uti etiam ea, si ab alio fuerit impetrata, aut alicujus officio superioris indulta; et renunciabit per juramentum suum exceptioni metus carceris, verberis et cujuslibet alterius coactionis et deceptionis, ita quod omnes exceptiones et deffensiones pro enumeratis habeantur; et renunciabit dictus frater Robertus omnibus habitis pro expressis, et specialiter juri dicenti: generalem renuntiationem non valere, et omni juris, consuetudinis aut statutorum Romane ecclesie vel ordinis Cluniacensis beneficio vel subsidio cujuscunque, per que directe vel indirecte posset rehabere prioratum predictum; et jurabit ulterius quod aliquam relaxationem seu absolutionem non impetrabit nec faciet impetrari, nec utetur etiam ea, si ab alio fuerit impetrata, super abrenuntiatione et abjuratione factis et habitis in exceptionibus supradictis. Item volumus quod predictus frater Robertus stet simplex claustralis monachus sine officio et administratione qualibet, usque ad festum Omnium Sanctorum, et residebit in aliquo prioratu ordini Cluniacensi subjecto, conventu Caritatensi dumtaxat excepto. Item a festo Omnium Sanctorum idem frater Robertus prioratum, administrationem vel officium poterit in ordine adipisci, obtenta prius super hoc licentia speciali ab ... abbate Cluniacensi; hoc etiam addito quod si postquam prioratum vel administrationem fuerit adeptus frater Robertus predictus, et contingat casus in quo ipse esset ad alium prioratum, aliam administrationem seu aliud officium, sui superioris arbitrio et beneplacito transferendus, de novo requireretur consensus et licentia abbatis predicti, et tociens idem fiet quociens similis casus continget, et istam ordinationem omnes abbates et ... priores ordinis inviolabiliter observare studeant et eam approbabit capitulum generale. Item predictus frater Robertus omni proprio quod nunc habet careat, ipsumque revelet et in manibus prioris Caritatensis ponatur; qui prior Caritatensis in presentia ... abbatis Cluniacensis jurabit eidem Roberto non restituere nec reddere proprium supradictum, nisi de voluntate et licentia abbatis supradicti. Et hec omnia et singula idem frater Robertus promittet attendere et servare nedum per proprium juramentum, sed etiam sub pena beneficii habiti tunc temporis et in futurum habendi; quo beneficio sit ipso facto, sine sententia alicujus superioris aut privatione seu resignatione aliqua facienda privatus, si contra predicta venerit vel consenserit. Et ordinamus etiam ac statuimus pro pace ordinis et quiete, quod cum fama detulerit dictum fratrem Robertum contra premissa venisse vel aliquod premissorum, aut etiam consensisse, a predicto ... abbate Cluniacensi, qui pro tempore fuerit seu vices illius gerente, deputabuntur tres de ordine Cluniacensi persone ydonee, que de plano, sine strepitu judicii et ordine judiciario, eo tamen vocato, ad hec inquirent; et si dicte tres persone retulerint in fide sua sibi constare dictum fratrem R. venisse contra predicta vel aliquod predictorum, aut etiam consensisse, eis stabitur et credetur omnino, ad hoc quod penam predictam incurrat et alias etiam juxta modum culpe debite castigetur, ita quod pena ipsius sit ceteris in exemplum. Quod si dicte tres persone in fide sua retulerint tantummodo dictum R. apud bonos et graves super hoc diffamatum, nisi idem canonice super hoc potuerit se purgare, similiter penam predictam incurrat. Quod omnibus quorum interest tenore presentium intimamus, in premissorum testimonium sigillum nostrum apponentes eisdem. Datum anno Domini millesimo ducentesimo nonagesimo tertio, die martis post octabas Pasche.